ओडिशातील बालासोर येथील झालेल्या रेल्वे अपघाताने अख्खा देश हादरून गेला होता. या अपघातात शेकडो प्रवाशांचा मृत्यू झाला होता. तर एक हजाराहून अधिक प्रवाशी जखमी झाले होते. या रेल्वे अपघाताची घटना ताजी असतानाच आता आणखी एक भीषण रेल्वे अपघात झाला आहे.
पश्चिम बंगालमधील बांकुरा येथे रेल्वे अपघात झाला आहे. येथे दोन मालगाड्या एकमेकांवर आदळल्या, त्यानंतर अनेक डबे रुळावरून घसरले. ही घटना रविवारी पहाटे चार वाजता ओंडा स्थानकात घडली. या घटनेत मालगाडीचा चालक जखमी झाला आहे. सूत्रांनी दिलेल्या माहितीनुसार, एका मालगाडीने दुसऱ्या मालगाडीला मागून धडक दिली, त्यामुळे सुमारे 12 डबे रुळावरून घसरले.
#WATCH | West Bengal: Two goods trains collided at Onda railway station in Bankura. Rail operation on Kharagpur–Bankura–Adra line has been halted. More details awaited. pic.twitter.com/T4sL5rn7Rp
— ANI (@ANI) June 25, 2023
मिळालेल्या माहितीनुसार, पश्चिम बंगालमधील बांकुरा येथे आज पहाटे ४ वाजता ही घटना घडली. एक मालगाडी ओंडा स्थानकावरून जात असताना मागून दुसऱ्या मालगाडीने धडक दिली. या घटनेमुळे 12 डबे रुळावरून घसरले. घटनेनंतर डबे रुळावर विखुरले होते. लोकांना अपघाताची माहिती मिळताच त्यांनी घटनास्थळ गाठले.
रेल्वे अधिकाऱ्यांनी दिलेल्या माहितीनुसार, दोन्ही मालगाड्या रिकाम्या होत्या. अपघाताचे कारण काय आणि दोन्ही गाड्यांची टक्कर कशी झाली, हे अद्याप स्पष्ट झालेले नाही. या अपघातामुळे आद्रा विभागात अनेक गाड्यांवर परिणाम झाला आहे. या दुर्घटनेनंतर पुरुलिया एक्स्प्रेससारख्या काही गाड्या या विभागातून जाण्यासाठी अप मार्ग लवकरात लवकर खुला करण्याचा रेल्वे अधिकारी प्रयत्न करत आहेत.
