जळगाव – गोदावरी फाऊंडेशनच्या डॉ.उल्हास पाटील रुग्णालयातर्फे गुरुवार, दिनांक ३ मार्च रोजी म्हसावद येथे निशुल्क आरोग्य तपासणी शिबिर घेण्यात आले. शिबिरापूर्वी प्रचार जोरदार झाल्याने आणि म्हसावदमधील सुजाण नागरिकांच्या सहकार्याने आजच्या शिबिराला चांगला प्रतिसाद लाभला असून ३४२ रुग्णांची तपासणी करण्यात आली.
म्हसावद येथील शितलताई चिंचोरे विचारमंच, म्हसावद, शिवसेना जळगाव ग्रामीण व गोदावरी फाऊंडेशन जळगाव यांच्या संयुक्‍त विद्यमाने जिल्हा परिषदेच्या प्राथमिक शाळेत मोफत आरोग्य तपासणी शिबिर घेण्यात आले. शिबिरात मोफत टू डी इको तपासणी, इसीजी, मधुमेह, रक्‍तदाब तपासणी केली जाणार आहे. याशिवाय कान-नाक-घसा विकार, नेत्ररोग, स्त्रियांचे विविध आजार, हृदयविकार तसेच मानसिक आजारांवरही तज्ञांकडून मोफत तपासणी करुन घेण्यात आली. शिबिरात ३४२ रुग्णांची तपासणी करण्यात आली असून त्यापैकी १२४ रुग्णांची टू डी इको तपासणी मोफत करण्यात आली.
यांनी केली तपासणी
या शिबिरात मेडिसीनचे डॉ.आदित्य नांदेडकर, सर्जरीचे डॉ.अनिश जोशी, ऑप्थलच्या डॉ.अनुजा गाडगीळ, स्त्रीरोग विभागातील इंटर्न इशा जैस्वाल, कान-नाक-घसा विभागातील दिपाली, हाडांच्या डॉ.परिक्षीत पाटील यांच्यासह मानसोपचार विभागातून गोविंद यादव यांनी रुग्णांची तपासणी केली. म्हसावदमधील नागरिकांनीसुद्धा तत्परतेने आपल्या कुटूंबासह येवून नि:शुल्क आरोग्य शिबिराचा लाभ घेतला, ९७ रुग्णांना पुढील उपचारासाठी रुग्णालयात येण्याचा सल्‍ला देण्यात आला आहे.
यांनी घेतले परिश्रम
शिबिर यशस्वीतेसाठी शितलताई चिंचोरे, नितीन ठाकरे, गोविंदा पवार, धनंजय सोनवणे (मोहाडी), सुनिल मराठे (बोरनार), भुषण मोरे (मोहाडी), नरेंद्र (नानाभाऊ) सोनवणे यांचे अनमोल सहकार्य लाभले असून मार्केटिंगचे रत्नशेखर जैन, पीआरओ टी.व्ही.पाटील, मकरंद महाजन, विशाल शेजवळ आदिंनी परिश्रम घेतले.
