भुसावळ : भावाचे दिव्यंगत्वाचे प्रमाणपत्र तयार करण्यासाठी नर्स असलेली बहीण त्याला घेऊन मुक्ताईनगर येथील उपजिल्हा रुग्णालयात गेली. तेथून मोपेड दुचाकीने परत येताना महामार्गावरील दीपनगर जवळ भरधाव ट्रकने दुचाकीला जोरदार धडक दिली. यात संतोष निकाळजे या दिव्यांग भावाचा जागीच मृत्यू, तर नर्स असलेली त्यांची बहीण सुनीता सोनवणे ह्या जखमी झाल्या.
मुक्ताईनगर येथील उपजिल्हा रुग्णालयात नर्स असलेल्या सुनीता बाजीराव कसबे-सोनवणे (रा. झेडटीएस परिसर, फेकरी शिवार, गोंदिया केबीनजवळ, भुसावळ) ह्या दिव्यांग असलेले त्यांचे भाऊ संतोष तुकडोजी निकाळजे (वय ५६, रा.कोरपावली ता.यावल) यांना घेऊन मुक्ताईनगरला गेल्या होत्या. तेथे बुधवारी दिव्यांग तपासणी शिबिर होते. तेथील काम आटोपून त्या दुपारी राष्ट्रीय महामार्गाने भुसावळकडे येण्यास निघाल्या. दीपनगर प्रकल्पाजवळ आल्यानंतर भुसावळ शहरातील झेडटीसी परिसराकडे जाणाऱ्या रस्त्यावर वळण घेण्यापूर्वी त्यांनी मोपेड दुचाकीचे (क्रमांक एमएच.१९-डीटी.२३७४) इंडिकेटर सुरू केले. त्याकडे दुर्लक्ष करून मागून आलेल्या ट्रकने (सीजी.०४-एचएस.८७४०) त्यांच्या दुचाकीला जबर धडक दिली.
यात काही क्षणापूर्वी जाे भाऊ अापल्यासाेबत हाेता, त्याचा रस्त्यावर पडलेला मृतदेह पाहून सुनीता ओक्साबोक्षी रडत होत्या. त्या स्वत: देखील जखमी झाल्या होत्या. रूग्णवाहिकेद्वारे त्यांना भुसावळ ट्रामा केअर सेंटरमध्ये नेण्यात आले. तसेच संताेष निकाळजे यांचा मृतदेह भुसावळ येथे आणण्यात अाला. तेथे ग्रामीण रुग्णालयाचे वैद्यकीय अधिकारी डाॅ. शिवाजी भाेसले यांनी शवविच्छेदन केले. जखमी सुनीता साेनवणे यापूर्वी भुसावळ ग्रामीण रुग्णालयात हाेत्या. तेथून त्यांची बदली मुक्ताईनगर येथे झाली होती.
