एरंडोल । कासोद्याकडून जळगावकडे जाणाऱ्या आर्थिक गुन्हे शाखेच्या गाडीवर अचानक झाड पडल्याने गाडीतील पोलीस निरीक्षक सुदर्शन दातीर (वय ३६) व चालक अजय महाजन (वय ३५) यांचा जागीच मृत्यू झाल्याची घटना गुरुवारी रात्री ९.३० वाजेच्या सुमारास घडली आहे. तर अपघातात तिघे जखमी झाले असून त्यांना जळगाव हलविण्यात आले आहे. धावत्या वाहनावर वृक्ष पडल्याने हा अपघात झाला आहे.
आर्थिक गुन्हे अन्वेषण शाखेची एमएच १९ एम ०७५१ या क्रमांकाची गाडी कासोद्याहून एरंडोल मार्गे जळगावला जात असताना हा अपघात झाला. यावेळी अंजनी धरणानजीक चिंचेचे झाड अचानक या गाडीवर कोसळले नेमके काय घडले हे कळण्याच्या आत गाडीचा अपघात होऊन पोलीस अधिकारी दातीर व गाडी चालक अजय महाजन हे जागीच ठार झाले तर तीन पोलीस कर्मचारी जखमी झाले.
या अपघाताची रात्री उशिरापर्यंत नोंद करण्याचे काम सुरू होते. दरम्यान पोलीस अधीक्षक एम. राजकुमार व पोलीस उपविभागीय अधिकारी सुनील नंदनवारकर यांनी घटनास्थळी भेट देऊन पाहणी केली तसेच एरंडोल ग्रामीण रुग्णालयात देखील भेट दिली.
