पाचोरा,(प्रतिनिधी)- महाराष्ट्र विधी सेवा प्राधिकरण मुंबई तसेच जिल्हा विधी सेवा प्राधिकरण यांच्या आदेशाने पाचोरा येथे तालुका विधी सेवा समिती तथा वकील संघ पाचोरा यांच्या संयुक्त विद्यमाने राष्ट्रीय लोकन्यायालयाचे आयोजन ९ डिसेंबर रोजी पाचोरा न्यायालयात करण्यात आले होते. या लोक न्यायालयात पाचोरा न्यायालयात दाखल असलेली १३५ दिवाणी व फौजदारी प्रकरणे निकाली निघून १ कोटी ५६ लाख २८ हजार ३७९ रुपयांची वसुली करण्यात आली.
तसेच ७२५ वादपुर्व प्रकरणांचा निपटारा होवनु १ कोटी ४ लाख १० हजार ४१० रुपयांची वसुली झाली अशी एकुण पाचोरा न्यायालयात ८६० प्रकरणा मध्ये २ कोटी ६० लाख ३८ हजार ७८९ रुपयांची वसुली करण्यात आली .
लोकन्यायालयात २ दिवाणी प्रकरणे व्हरच्युअली व्हीडीओ कॉन्फरन्स द्वारे निकाली काढण्यात आले. या लोकन्यायालय कार्यक्रमास तालुका विधी सेवा समिती पाचोऱ्याचे अध्यक्ष तथा न्यायिक अधिकारी दिवाणी न्यायाधीश तथा पॅनल प्रमुख जी. बी. औंधकर, सह दिवाणी न्यायाधीश एम. जी. हिवराळे, २ रे सह दिवाणी न्यायाधीश तथा पॅनल प्रमुख एल. व्ही. श्रीखंडे तसेच पंच सदस्य विधीज्ञ अमोल म्हस्के, वकील संघाचे अध्यक्ष विधीज्ञ प्रविण पाटील, उपाध्यक्ष मंगेश गायकवाड, सचिव राजेंद्र पाटील, सरकारी अभियोक्ता आर. के. माने तसेच जेष्ठ विधीज्ञ मंडळी व न्यायालयीन कर्मचारी वर्ग उपस्थीत होते.
तसेच यापुढे होणााऱ्या लोकन्यायालयात जास्तीत जास्त प्रकरणे ठेवून सहभाग नोंदवा व लोक न्यायालयाचा लाभ घ्यावा असे आव्हाहन तालुका विधी सेवा समिती पाचोऱ्याचे अध्यक्ष जी. बी. औंधकर यांनी केले. लोक न्यायालय यशस्वीतेसाठी न्यायालयीन कर्मचारी यांनी परिश्रम घेतले. या लोकन्यायालयात राधेशाम दायमा विरुध्द जैन पाठशाळा यांचेतील ३० वर्षापुर्वीचा वाद सदरील लोकन्यायालयात मिटविण्यात आला. त्याचप्रमाणे सन १९७६ मधील दाव्यासंदर्भात दाखल दरखास्त सुध्दा तडजोडीने मिटविण्यात आलेली आहे. तसेच २ प्रकरणांचा निपटारा ऑनलाईन पध्दतीने करण्यात आला.
