पाचोरा : पाचोऱ्यात एक अत्यंत हृदयद्रावक घटना घडली आहे. आपल्या तीन वर्षांचा मुलगा आणि वर्षभराच्या चिमुकलीला पोरकं करुन एका विवाहित महिलेने अत्यंत टोकाचा निर्णय घेतला आहे. येथे राहत्या घरात गळफास लावू २५ वर्षीय विवाहितेने आत्महत्या केली. ही घटना पाचोरा शहरातील मोंढाळे रोडवरील परिसरात घडलीय.
दिपाली देविदास पाटील (वय २५ रा. मोंढाळे रोड, पाचोरा) असे मृत विवाहितेचे नाव आहे.दिपालीने आत्महत्ये सारखं टोकाचं पाऊल का उचललं, याचे कारण अद्याप स्पष्ट होऊ शकले नाही. याप्रकरणी पाचोरा पोलिस स्टेशनमध्ये अकस्मात मृत्यूची नोंद करण्यात आली.
मोंढाळे रोडवरील रहिवाशी देविदास पाटील हे शहरातील हॉटेलमध्ये वेटरचे काम करुन आपल्या परिवाराचा उदरनिर्वाह चालवत होते. शुक्रवारी सकाळी देविदास पाटील हे नेहमी प्रमाणे आपल्या कामासाठी घरातून निघाले. त्यांच्या पत्नी दिपाली देविदास पाटील या तीन वर्षांचा अल्पेश आणि १२ महिन्यांच्या चिमुकलीसह घरी होत्या.
अल्पेश हा बाहेर खेळत होता, खेळता-खेळता तो दुपारी दोन वाजता घरात आला. तेव्हा त्याला त्याची आई छताला गळफास घेतलेल्या अवस्थेत दिसून आली. त्यानंतर अल्पेश हा आई-आई करत घराबाहेर पळत सुटला, अल्पेशने शेजाऱ्यांना गळ्या भोवती हात लावुन इशारा करत आई… आई… असे सांगताच शेजाऱ्यांनी घरात जावून बघितले असता दिपाली ही छताला गळफास लावलेल्या अवस्थेत आढळून आली.
घटनेची तात्काळ पाचोरा पोलिस स्टेशनला माहिती दिली. याबाबत पाचोरा पोलिस स्टेशनमध्ये अकस्मात मृत्यूची नोंद करण्यात आली. या घटनेचा पुढील तपास पोलिस निरीक्षक राहुल खताळ यांच्या मार्गदर्शनाखाली पोलिस उपनिरीक्षक विजया वसावे या करीत आहे. दिपालीने आत्महत्ये सारखं टोकाचं पाऊल का उचललं, याचे कारण अद्याप स्पष्ट होऊ शकले नाही. दरम्यान, तिच्या मृत्यूची बातमी कळाल्यावर तिचे पती तसेच कुटुंबियांनी मोठा आक्रोश केला. दुर्देवी घटनेने कोवळ्या वयातच दोन चिमुकल्यांचे मातृछत्र हरपले असून या घटनेने उपस्थितांचेही डोळे पाणावले होते. या घटनेने हळहळ व्यक्त केली जात आहे.
