अप्पर जिल्हाधिकारी यांना निवेदन
जळगाव – पत्रकार संतोष ढिवरे यांच्यावर झालेल्या भ्याड हल्ल्याचा तीव्र निषेध करून आरोपींना तात्काळ अटकेसह दोषींवर कडक कारवाई करण्यात यावी या मागणीचे निवेदन अप्पर जिल्हाधिकारी गोरक्ष गाडीलकर यांना महाराष्ट्र राज्य मराठी पत्रकार संघातर्फे देण्यात आले. दरम्यान अप्पर जिल्हाधिकारी यांनी या संदर्भात चौकशी करून दोषींवर त्वरीत कारवाई करण्याचे आश्वासन दिले.
गुरूवार दि.20 जून रोजी हॉटेल करीश्मा येथे एकास डांबून ठेवत मारहाण होत असल्याची माहिती मिळताच या घटनेची माहिती घेण्यासाठी पत्रकार संतोष ढिवरे गेले असता हॉटेल मालक शाम भंगाळे व 10 ते 15 गुंड प्रवृत्तीचे वेटर यांनी त्यांना जबर मारहाण करीत प्राण घातक हल्ला केला. या हल्ल्यात संतोष ढिवरे हे जबर जखमी झाले असून त्यांच्यावर जिल्हा रूग्णालयात उपचार सुरू आहे. या संदर्भात जिल्हापेठ पोलिस ठाण्यात गुरनं 110/19 अन्वये गुन्हा दाखल करण्यात आला आहे. निवेदन देण्या प्रसंगी जिल्हाध्यक्ष प्रविण सपकाळे, कार्याध्यक्ष शरद कुळकर्णी, उपाध्यक्ष नरेश बागडे, भारत ससाणे, रितेश माळी, शैलेश पाटील, ज्ञानेश्वर पाटील, दीपक सपकाळे, इम्रान शेख, चेतन निंबोळकर, एस.पी. सुरवाडे, मुकेश जोशी, स्वप्नील सोनवणे, दीपक पाटील आदी पत्रकार बांधव उपस्थित होते.
