कोल्हापूर: भाजपचे नेते, आमदार नितेश राणे यांची प्रकृती अचानक बिघडली असून त्यांना मध्यरात्रीपासून उलट्यांचा त्रास सुरू झाला आहे. त्यामुळे त्यांच्यावर तातडीने उपचार करण्यात येत आहेत. त्यामुळे वैद्यकीय पथकाने आता नितेश राणे यांच्या सर्व तपासण्या करण्याचा निर्णय घेतल्याचे समजते. नितेश राणे यांच्या जामीन अर्जावर मंगळवारी सिंधुदुर्ग सत्र न्यायालयात युक्तिवाद झाला होता. यावर आज बुधवारी निकाल येणे अपेक्षित आहे. त्यामुळे आता नितेश राणे यांच्या जामीन अर्जाच्या सुनावणीत त्यांच्या प्रकृतीचा विचार होणार का, हे पाहावे लागेल.
संतोष परब हल्लाप्रकरणात न्यायालयीन कोठडीत असलेले भाजप आमदार नितेश राणे यांची प्रकृती आणखीनच बिघडल्याची माहिती समोर येत आहे. नितेश राणे यांच्या छातीत दुखत असल्यामुळे त्यांच्यावर रुग्णालयात उपचार सुरु आहेत. सुरुवातीला त्यांना ओरोस येथील जिल्हा रुग्णालयात ठेवण्यात आले होते. परंतु, त्याठिकाणी हदयरोग तज्ज्ञ नसल्याने नितेश राणे यांना सोमवारी कोल्हापूरच्या सीपीआर रुग्णालयात हलवण्यात आले होते.
