मुंबई : डोंबिवलीत धक्कादायक प्रकार घडला आहे. डोंबिवलीतील भोपर परिसरा एका १४ वर्षीय अल्पवयीन मुलीवर २९ जणांकडून सामुहिक बलात्कार केल्याची धक्कादायक घटना घडली आहे. या प्रकरणी मानपाडा पोलीस ठाण्यात गुन्हा दाखल केला आहे. दरम्यान, याप्रकरणी आतापर्यंत २ अल्पवयीन आरोपीसह २३ जणांना अटक केली असून उर्वरित ६ आरोपीचा शोध सुरू आहे.
डोंबिवली नजीक असलेल्या भोपर परिसरात राहणाऱ्या १४ वर्षीय मुलीची एका तरुणाशी ओळख होती या ओळखीतून त्यांच्यात जानेवारी २०२१मध्ये शारिरीक संबध निर्माण झाले. मात्र या तरुणाने या दरम्यान तरुणीचे अश्लील व्हिडीओ तयार करत या व्हिडीओच्या आधारे या तरुणीला ब्लॅकमेल करत आपल्या इतर मित्रासमवेत या तरुणीवर वेळोवेळी अत्याचार केल्याचा या पीडित तरुणीचा आरोप आहे. मागील ९ महिन्याच्या कालावधीत तब्बल २९ जणांनी पीडितेला व्हिडीओच्या आधारे ब्लॅकमेल करत डोंबिवली, रबाळे, वडवली, बदलापूर या विविध ठिकाणी तिला नेत तिच्यावर सामूहिक बलात्कार केल्याचा आरोप पीडितेने केला आहे.
दोन दिवसापूर्वी यातील ७ आरोपींनी पीडितेला वडवली येथे नेत तिच्यावर एकाच वेळी सामूहिक बलात्कार केल्यानंतर तिला प्रचंड वेदना होऊ लागल्याने तिने ही घटना आपल्या आईला सांगितल्यानंतर आईच्या ममतेने तिने याप्रकरणी मानपाडा पोलीस ठाण्यात गुन्हा दाखल केला आहे. याप्रकरणी आतापर्यंत २३ आरोपीना पोलिसांनी अटक केली आहे यातील २ आरोपी अल्पवयीन असल्याचे पोलीसानी सांगितले. दरम्यान पीडितेला उपचारासाठी ठाणे सिव्हिल रुग्णालयात दाखल करण्यात आले असून तिची तब्येत स्थिर असल्याचे सांगितले.
