जळगाव: तालुक्यातील शिरसोली प्र. बो. येथील संजय हरी पाटील (वय ३२) या तरुणाने चक्क गावातील स्मशानभूमीत शर्टाच्या सहाय्याने गळफास घेवून आत्महत्या केली. ही घटना गुरुवारी सायंकाळी उघडकीस आल्याने खळबळ उडाली आहे. याप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
नेमकी घटना काय?
संजय हरी पाटील हा शिरसोली प्र.बो येथे कुटुंबासह वास्तव्यास असून तो ट्रकचालक म्हणून काम करत होता. दरम्यान गुरुवारी संध्याकाळी संजय पाटील हा शिर्डीला जात असल्याचं सांगून घराबाहेर पडला. त्यानंतर त्यांनी गावातील स्मशानभूमी गाठली. या स्मशानभूमीत असलेल्या पत्र्याच्या शेडमध्ये लोखंडी अँगलला शर्टाच्या साहाय्याने गळफास घेवून संजय पाटीलने आत्महत्या केली.
गावातील गोलू पवार हे स्मशानभूमी परिसरातून जात असताना त्याच्या लक्षात ही बाब आली, त्यांनी तत्काळ घटनेची माहिती गावातील पोलिस पाटील शरद पाटील, श्रीकृष्ण बारी यांना कळविली. पोलिस पाटील यांनी घटनास्थळ गाठले आणि या प्रकाराची माहिती एमआयडीसी पोलिसांना कळविली. एमआयडीसी पोलिसांनी तत्काळ घटनास्थळ गाठलं. नागरिकांच्या मदतीने संजय पाटील याला खाली उतरवून जिल्हा रुग्णालयात हलविले. याठिकाणी वैद्यकीय अधिकाऱ्यांनी त्याला मृत घोषित केले. स्मशानभूमीत संध्याकाळच्या वेळी संजय पाटील याने आत्महत्या केल्याच्या घटनेने गावकरी सुन्न झाले असून सर्वत्र हळहळ व्यक्त केली जात आहे.
