जळगाव : पाचोरा पोलीस ठाण्यात दाखल असलेल्या बाललौंगिक अत्याचाराच्या गुन्ह्यात जामिनावरील आरोपी अरुण भगवान गवळी (वय-२२ रा. गुम्मी ता. जि. बुलढाणा) याला पोलीस जळगाव जिल्हा न्यायालयात हजर करत होते. मात्र यादरम्यान लघुशंकेचा बहाणा करत पोलिसांचे लक्ष चुकवून आरोपीने जिल्हा न्यायालयाच्या आवारातून पळ काढल्याची घटना सोमवार, २० फेब्रुवारी रोजी सायंकाळी पावणे पाच वाजेच्या सुमारास घडली. याप्रकरणी शहर पोलीस ठाण्यात गुन्हा दाखल करण्यात आला होता. प्रचंड शोधाशोध केल्यानंतर आता पुन्हा आरोपीला ताब्यात घेण्यात पोलिसांना यश आलं आहे.
पाचोरा पोलीस ठाण्यात दाखल असलेल्या बाललौंगिक अत्याचाराच्या गुन्ह्यात अरुण गवळी याला पोलिसांनी अटक केली होती. करोना काळापासून तो जामिनावर बाहेर होता. सोमवारी त्याला ताब्यात घेत पोलीस जिल्हा न्यायालयात हजर करणार होते. पोलीस हवालदार विजय पाटील हे त्याला हजर करण्याकामी सोमवारी जिल्हा न्यायालयात घेऊन आले, यादरम्यान दुपारी ४.४५ च्या सुमारास अरुण गवळी याने लघुशंकेला जात असल्याचे सोबतच्या पोलीस कर्मचाऱ्यांना सांगितले. त्यानंतर पोलीस हवालदार विजय पाटील हे त्याला लघुशंकेसाठी घेऊन गेले.
यादरम्यान कर्मचारी गुन्ह्याच्या केस वॉच यांना गुन्ह्यातील डी.एन.ए. अहवाल प्राप्त नसल्याबाबत कळवीत होते. पोलीस कर्मचारी बोलण्यात व्यस्त असल्याची संधी साधत अरुण गवळी याने पोलिसांची नजर चुकवून जिल्हा न्यायालयातून पळ काढला. याप्रकरणी शहर पोलीस ठाण्यात विजय पाटील यांच्या फिर्यादीवरून आरोपी अरुण गवळी याच्याविरोधात गुन्हा दाखल करण्यात आला असून अधिक तपास पोलीस नाईक सचिन वाघ करीत आहेत.
दरम्यान, शेवटचे वृत्त हाती आले तेव्हा स्थानिक गुन्हे शाखेचे पथक आरोपी अरुण गवळी याच्या गावी गुम्मी येथे पोहचले होते. तसेच त्याला त्याच्या घरुन ताब्यात घेण्यात आले असून आज मंगळवारी दुपारी ४ वाजेपर्यंत पथक जळगावात पोहोचणार आहे.
