जळगाव प्रतिनिधी | केंद्रीय मंत्री नारायण राणेंनी मुख्यमंत्र्यांबाबत केलेल्या वादग्रस्त वक्तव्याचे पडसाद राज्यभरात उमटले होते. दरम्यान, जळगावमध्ये राणेंविरुद्ध शिवसैनिकांनी आंदोलन केली. यावेळी भाजप कार्यकर्त्यांना धक्काबुक्की केल्याप्रकरणी शिवसेनेच्या पदाधिकार्यांवर रात्री गुन्हा दाखल करण्यात आला आहे.
राणेंनी मुख्यमंत्र्यांबाबत केलेल्या वादग्रस्त वक्तव्याच्या निषेर्धात काल जळगाव जिल्ह्यात सकाळपासून आंदोलने करण्यात आली. तर जळगाव शहरात दुपारी शिवसेनेचे पदाधिकारी व कार्यकर्ते भाजप कार्यालयात शिरले. त्यांनी तेथे कोंबड्या फेकून उपस्थितांना धक्काबुक्की केली. या प्रकाराचा महानगराध्यक्ष दीपक सूर्यवंशी यांनी निषेध करून गुन्हा दाखल करण्याचा इशारा दिला होता.
यानंतर रात्री शहर पोलीस स्थानकात शिवसेनेच्या २५ पदाधिकार्यांवर जमावबंदीचे उल्लंघन आणि धक्काबुक्की केल्या प्रकरणी गुन्हा दाखल करण्यात आला आहे. यात महापौर आणि उपमहापौरांसह अन्य पदाधिकार्यांचा समावेश आहे.
