जळगाव,(प्रतिनिधी)- कोरोना रुग्णांसाठी आवश्यक असणारे रेमडेसिवीर इंजेक्शन काळाबाजार करणारी टोळी च्या पोलिसांनी मुसक्या आवळल्या असून जळगाव पोलिसांनी शोधून या प्रकरणी दहा पेक्षाही अधिक जणांना अटक करण्यात आल्याची माहिती पोलिस अधीक्षक डॉ. प्रविण मुंढे यांनी आज पत्रकार परिषदेत दिली.
दोन वेगवेगळ्या प्रकरणात जादा दराने विक्री केलेले ८ रेमडीसीवीर इंजेक्शन्स ताब्यात घेण्यात आली आहे.सरकारी दराच्या तुलनेत कमाल ३५ हजार रुपयांपर्यंत या रेमडेसिवीर इंजेक्शनची चढ्या दराने विक्री सुरु होती. दरम्यान हा गैरप्रकार जळगाव पोलिसांनी उधळून लावलला आहे.
याप्रकरणी दोन गुन्हे दाखल करण्यात आले आहेत. पहिल्या गुन्ह्यात ९ आरोपी निष्पन्न करण्यात आली असून त्यातील एकुण ८ आरोपी ताब्यात घेण्यात आले आहेत. अटकेतील आरोपींकडून ६ इंजेक्शन्स हस्तगत करण्यात आली आहेत. तर दुसऱ्या गुन्ह्यात २ इंजेक्शन्स हस्तगत करण्यात आली आहेत.
शहरातील एका खाजगी रुग्णालयातील वार्ड बॉय शुभम शार्दुल याच्यापासून तपासाची लिंक लागण्यास सुरुवात झाली. शुभम शार्दुल याने मयुर विसावे या वैद्यकीय प्रतिनिधीकडून इंजेक्शन्स घेतले होते. मयुर विसावे याने ते इंजेक्शन्स आकाश जैन एका मेडिकल व्यावसायिकडून घेतले होते. याप्रकरणी पुढील तपास सुरु आहे.
तसेच दुसऱ्या प्रकरणात दहा जणांची लिंक आढळून आली. त्यापैकी नऊ जण अटक करण्यात आले आहेत. या प्रकरणातील शेख समीर शेख सगीर याच्यापासून तपासाची लिंक लागली. शेख समीर हा शहरातील नामवंत एका खाजगी रुग्णालयात लॅब असिस्टंट म्हणून कामाला होता. रेमडीसीवीर इंजेक्शनचा काळाबाजार करणाऱ्या टोळीची लिंक तपासली असता त्यात दहा आरोपी निष्पन्न झाले. त्यापैकी नऊ जणांना अटक करण्यात आली. या टोळीतील डॉ. तौफिक शेख हा फरार होण्यात यशस्वी झाला आहे. पोलिस त्याच्या मागावर आहे. डॉ. तौफिक शेख हा तांबापुरा येथील दवाखान्यात काम करत होता.
रेमडेसीवरचा काळा बाजार करत असल्यास पोलिसांना संपर्क करा…
काळाबाजार करत वाढीव दराने कुणी रेमडेसिवीर इंजेक्शन्स विकत असतील वा कुणाला याबाबत माहिती असल्यास जळगाव पोलिसांशी संपर्क साधण्याचे आवाहन पोलिस अधिक्षक डॉ. प्रविण मुंढे यांनी यावेळी केले आहे.
