मुंबई, (प्रतिनिधी)- राष्ट्रवादी काँग्रेसचे नेते एकनाथराव खडसे यांना सक्तवसुली संचालनालय अर्थात ईडीने चौकशीचे समन्स बजावले असून ते चौकशीकामी ईडी कार्यालयात आज हजर राहणार असल्याचे खडसे यांनी पत्रकारांशी बोलतांना सांगितले आहे.
खडसेंचे जावई गिरीश चौधरी यांना पुण्यातील भोसरी जमीन घोटाळ्या प्रकरणी अटक केल्या नंतर ईडीने भोसरी जमीन घोटाळ्या प्रकरणी खडसे यांनाही समन्स पाठवले आहेत. ईडीने पाठवलेल्या नोटीसनुसार खडसे यांना आज गुरुवार दि.८ जुलै सकाळी ११ वाजता मुंबईतील ईडीच्या कार्यालयात हजर राहण्याचे सांगण्यात आले होते.
काल राष्ट्रवादी कडून खडसेंची प्रकृती खालवली असल्याचे वृत्त समोर आले होते त्यानंतर खडसे हे आज ईडी च्या चौकशीला सामोरे जातील की नाही अशी संभ्रमअवस्था होती मात्र त्यांनी ईडी कार्यालयात चौकशी कामी आज हजर राहून सहकार्य करणार असल्याचे स्पष्ट केले आहे.
विशेष म्हणजे या प्रकरणाची कारवाई थांबवण्यासाठी एकनाथ खडसे हायकोर्टात गेले आहेत. हायकोर्टाने ईडीला सुनावणी सुरु असेपर्यंत कारवाई न करण्याचे आदेश दिले आहेत. पण चौकशीबाबत अद्याप कोणतेही आदेश दिलेले नाहीत. कोर्टाचे आदेश असल्याने एकनाथ खडसे यांच्यावर गंभीर स्वरूपाची कारवाई होणार नाही. मात्र, त्यांना चौकशीला सामोरं जावं लागणार आहे.
