जळगाव – चोपडा तालुक्यातील तापी नदी पात्रातून अवैध वाळू उपसा होत असल्याच्या तक्रारी होत आहे. त्यानुसार महसूल विभागाकडून अवैध गौणखनिज वाहतूकीवर आळा बसविण्याच्या उद्देशाने कार्यवाही करण्यात येत आहे.
चोपडा तालुक्यातील बुधगाव, वाळकी-शेंदणी, मालखेडा, वढोदा, पिंप्री, कठोरा, कोळंबा, कुरवेल, खाचणे, सुटकार, तांदळवाडी, दोंदवाडे, धुपे खुर्द, विचखेडा, घाडवेल, अनवर्दे या गावातील तापी नदीपात्रातुन वाहनाने वाळू चोरीस जाऊ नये. तसेच वाळू चोरीमुळे कायदा व सुव्यवस्थेचा प्रश्न निर्माण होवू नये, या उद्देशाने या सर्व गावांतील तापी नदीपात्रात वाहनांना प्रवेश करण्यास प्रतिबंध करण्यात आला असल्याची माहिती श्रीमती सीमा अहिरे, उपविभागीय दंडाधिकारी, अमळनेर भाग, अमळनेर यांनी दिली आहे. तसेच चोपडा तालुक्यातील तापी या नदी परिसरातील गावांसाठी फौजदारी प्रक्रीया संहिता 1973 चे कलम 144 आणि अन्य सर्व प्राप्त अधिकारानुसार 20 फेब्रुवारी, 2020 पर्यंत वाहनांना नदीपात्रात प्रवेश करण्यास प्रतिबंध करण्यात आला आहे. तरी नागरिकांनी कायदा व सुव्यवस्था अबाधित राखण्यासाठी प्रशासनास सहकार्य करावे. असे आवाहन उपविभागीय दंडाधिकारी, अमळनेर भाग, अमळनेर श्रीमती सीमा आहिरे यांनी एका प्रसिध्दी पत्रकान्वये केले आहे.
