जळगाव : जळगाव तालुक्यातील नशिराबाद गावाजवळ राष्ट्रीय महामार्गावर आज रविवारी दोघा मित्रांचा दुचाकीवर भीषण अपघात झाला आहे. या भीषण अपघातात दोघांचा जागीच मृत्यू झाला आहे. दोघंही जळगावातील एमआयडीसीत कामाला होते. संदिप मानसिंग शिरसाम (वय २४), बसंत मुन्ना वरखेडे (वय २८, दोन्ही रा. धमण्या. जि. बैतूल, मध्यप्रदेश) असं दोन्ही मयत तरुणांची नाव आहेत.
मुळ मध्यप्रदेशातील आदीवासी तरुण संदिप मानसिंग शिरसाम आणि वसंत मुन्ना वरखेडे हे दोघे गेल्या काही दिवसांपासून जळगावात रोजगारासाठी आले होते. हे दोघं जळगाव शहरातील एमआयडीसी परिसरात असलेल्या वेगवेगळ्या कंपनीत कामाला होते. एमपी ४८ एमआर ५३९७ या क्रमाकांच्या दुचाकीने संदीप आणि बसंत हे दोघंही कंपनीत अर्ध्या दिवसाची सुटी घेऊन रविवारी दुपारी गावी जाण्यासाठी निघाले. यादरम्यान जळगाव तालुक्यातील नशिराबादजवळ भुसावळकडून जळगावच्या दिशेने येणाऱ्या एमएच ०४ डीएस २२१७ या क्रमाकांच्या भरधाव ऑईलच्या टँकरने त्यांच्या दुचाकीला जोरदार धडक दिली.
या धडकेत दुचाकीवरील संदीप आणि बसंत या दोघांचा जागीच मृत्यू झाला. अपघाताची माहिती कळताच नशिराबाद पोलिस ठाण्याचे सहाय्यक निरीक्षक अनिल मोरे यांच्यासह सहाय्यक फौजदार अलियार खान, अतुल महाजन आणि रुपेश साळवे यांच्या पथकाने घटनास्थळी धाव घेत मदतकार्य केले. महामार्गावरील मयत तरुणांचे मृतदेह तातडीने खासगी गाडीतून जिल्हा सामान्य रुग्णालयात दाखल करण्यात आले.
