जळगाव : जळगाव येथील राष्ट्रवादी काँग्रेस कार्यालयात प्रदेशाध्यक्ष जयंत पाटील यांच्या उपस्थितीत राष्ट्रवादी काँग्रेसची बैठक पार पडली. दरम्यान, या बैठकीत मनोगत व्यक्त करताना एकनाथ खडसे यांनी त्यांच्या मनातली खदखद व्यक्त केल्याचं पहायला मिळालं. यावेळी त्यांनी मुख्यमंत्री शिवसेना पक्षप्रमुख उद्धव ठाकरे यांच्या विषयी नाराजी व्यक्त केलीय.
नेमकं काय म्हणाले खडसे?
सर्वांचं समाधान करेल, असा माणूस अजून जन्माला यायचाय, तो अजून जन्माला आलेला नाही, त्यामुळे सरकार कोणाचंही असलं, तरी समाधान होतं असं नाही, कार्यकर्त्यांची स्वाभाविक इच्छा असते की माझ्या नेत्याने माझं ऐकलं पाहिजे, माझ्या नेत्याने सरकारमध्ये असताना माझं काम केलं पाहिजे, असं एकनाथ खडसे म्हणाले.
अनेकांनी सांगितलं की सरकार असताना मला न्याय मिळत नाही, काही अंशी हे खरंच आहे, तुमचा अनुभव असेल, जयंतरावांचाही अनुभव हाच आहे, माझाही अनुभव हाच आहे, शरद पवार साहेब, अजितदादा, जयंतराव, मी मुख्यमंत्र्यांकडे गेल्यानंतरही बऱ्याच वेळा… पुढचं नाही सांगत.. कधी कधी सगळ्या फाईल त्यांच्याकडे गेल्यानंतरही त्यांनी… मी टीका करत नाही, परंतु हे साधारण चालतं, असं एकनाथ खडसे म्हणाले
मी जेलमध्ये जाणार असल्याच्या तारखा दिल्या जात आहेत, आता सीबीआय चौकशी सुरु केली आहे, सगळ्या चौकशा लावल्या आहेत, जर काही केलं नसेल तर घाबरण्याचं कारण नाही, एक रुपयाचा भ्रष्टाचार केला नाही, केवळ बदनाम करण्याचा प्रयत्न आहे, असं मत एकनाथ खडसे यांनी यावेळी व्यक्त केलं.
