जळगाव: जळगावातील गेंदालाल मिलमध्ये राहणाऱ्या तरुणाने नागपूर जिल्ह्यातील तरुणीवर तब्बल सात महिने शारीरिक अत्याचार केल्याची धक्कादायक घटना उघड झाली आहे. याप्रकरणी तरुणीच्या फिर्यादीवरुन दानिश मुलतानी (रा. गेंदालाल मिल) या संशयिताविरुद्ध गुन्हा दाखल करत त्याला अटक करण्यात आली आहे.
पीडित तरुणी ही नागपूर जिल्ह्यातील एका गावातील रहिवासी असून २०२१ मध्ये दिवाळीमध्ये तिची इन्स्टाग्रामवर जळगावातील गेंदालाल मिल येथील दानिश मुलतानी याच्याशी ओळख झाली. इन्स्टाग्रामवर झालेल्या ओळखीनंतर त्याने तिला प्रपोज केले. पहिल्या नकारानंतर तिने होकार दिला. त्यानंतर त्याने लग्नाचे आमिष व धमकी देऊन नागपूर येथील लॉजवर तिच्यावर अत्याचार केला.
जळगाव येथील मित्राच्या घरीही त्याने तिच्या मनाविरुद्ध शारीरिक संबंध ठेवले. २१एप्रिल २०२२ रोजी त्या युवतीचे लग्न ठरलेले होते. त्याबाबत त्याला सांगूनही तो लग्न मोडण्याच्या व बदनामी करण्याच्या धमक्या देत होता. त्याच्यासोबत लग्न करण्यासाठी त्याचा मित्र बाबू उर्फ उमर व मामाची मुलगी आशू हिने सांगितले. त्यानंतर १ एप्रिल राेजी ती युवती नागपूर येथे निघून गेली. तेथे दानिश मित्रासह कार घेऊन आला. त्यानंतर दोघांनी बाबाताज दर्गा येथे पूजा केली. तेथून रात्री ११.३० वाजता त्याच्या मलकापूर येथे राहणाऱ्या सावत्र आईकडे गेले. तेथे दोन दिवस राहण्यास सांगून तो निघून गेला. त्यानंतर ती युवती १० एप्रिल रोजी जळगाव येथे आली.
यादरम्यान दानिशने त्याचा फोन बंद करुन ठेवला. फोन लागत नसल्याने तरुणी जळगावात नुतन मराठा महाविद्यालयाजवळ पोहचली. दानिशसोबत संपर्क होत नसल्याने तरुणी हताश झाली व याच ठिकाणी रडत बसली. त्यावेळी काही तरुणांचे तिच्याकडे लक्ष गेले. तरुणांना पीडित तरुणीने आपबिती कथन केली. त्यानंतर तरुणांनी तिला एका समाजसेविकेकडे नेले. समाजसेविकेच्या मदतीने या तरुणी तक्रारी दाखल करण्यासाठी शहर पोलीस ठाण्यात पोहचली.
तरुणीच्या तक्रारीनुसार शहर पोलिसात सोमवारी रात्री गुन्हा दाखल करण्यात आला. गुन्हा दाखल होऊन काही तासातच तपास अधिकारी सहाय्यक पोलीस निरिक्षक संदीप परदेशी यांच्या मार्गदर्शनाखाली गुन्हे शोध पथकाने संशयित दानिश यास गेंदालाल मिलमधून अटक केली. या प्रकरणी पुढील तपास सुरु आहे.
