जळगाव : हिंदूसूर्य महाराणा प्रतापसिंह यांच्या जयंतीनिमित्त जळगाव शहरात भव्य शोभायात्रा आणि सामूहिक उत्सवाचे आयोजन करण्यात आले आहे. हिंदूसूर्य महाराणा प्रतापसिंह जयंती सार्वजनिक उत्सव समिती, जळगाव यांच्या वतीने शनिवार, ९ मे रोजी संध्याकाळी ६ वाजेपासून या उत्सवाला प्रारंभ होणार आहे.
शहरातील शिवतीर्थ मैदान (जी. एस. ग्राउंड) येथून या भव्य मिरवणुकीची सुरुवात होणार असून जळगाव शहरासह आजूबाजूच्या परिसरातील सर्व समाजातील हिंदू बांधवांना मोठ्या संख्येने सहभागी होण्याचे आवाहन करण्यात आले आहे. समितीच्या वतीने हा उत्सव “भव्य व दिव्य” स्वरूपात साजरा करण्याचा निर्धार व्यक्त करण्यात आला आहे.
उत्सव समितीच्या आवाहनानुसार, पुरुषांनी पारंपरिक पोशाख परिधान करावा तसेच महिलांनी लाल अथवा पिवळ्या रंगाची साडी नेसून सहभाग नोंदवावा. विविध संघटना, संस्था, मंडळे आणि शाखांनी आपल्या परिसरातून महाराणांची शोभायात्रा काढून कोर्टाजवळील छत्रपती शिवाजी महाराज पुतळा येथे एकत्र जमायचे आहे.
यानंतर सर्वसमावेशक भव्य मिरवणूक शहरातील प्रमुख मार्गांवरून काढण्यात येणार आहे. या मिरवणुकीत कोल्हापूर येथील शिवकालीन युद्धकला प्रशिक्षण केंद्राच्या आखाड्याकडून रोमांचक युद्धकला प्रात्यक्षिके सादर केली जाणार आहेत. तसेच ढोल-ताशा पथक, मंगल वाद्य, आकर्षक लाईटिंग, झेंडे आणि बग्गी यामुळे शोभायात्रेचे आकर्षण अधिक वाढणार आहे.
ही मिरवणूक स्टेट बँक, बस स्टँड, स्वातंत्र्य चौक मार्गे हिंदूसूर्य महाराणा प्रतापसिंह स्मारकाजवळ पोहोचणार असून तेथे पूजन व सामूहिक कार्यक्रमाचे आयोजन करण्यात आले आहे.
उत्सव समितीने सर्व समाजातील नागरिकांनी सहपरिवार उपस्थित राहून कार्यक्रम यशस्वी करावा तसेच हा संदेश विविध संघटना, संस्था आणि मंडळांमध्ये मोठ्या प्रमाणावर प्रसारित करण्याचे आवाहन केले आहे.
