जळगाव, नजरकैद न्यूज — जळगाव महानगरपालिकेच्या २०२६ च्या निवडणुकीच्या पार्श्वभूमीवर प्रभाग क्रमांक ३ मध्ये राजकीय हालचालींना वेग आला आहे. प्रभागाच्या सर्वांगीण विकासासाठी ठोस व परिणामकारक कामे करण्याची हमी माजी नगरसेविका मीनाताई धुडकु सपकाळे यांनी दिली असून, त्या अपक्ष उमेदवार म्हणून पुन्हा एकदा निवडणूक रिंगणात आहेत.
मीनाताई सपकाळे यांनी नगरसेविका असताना आपल्या प्रभागात नागरी सुविधा, रस्ते, स्वच्छता, पाणीपुरवठा आदी मूलभूत प्रश्नांवर लक्ष केंद्रित केल्याचे त्यांनी सांगितले. मागील कार्यकाळात केलेल्या विकासकामांचा अनुभव आणि नागरिकांचा विश्वास हेच आपले भांडवल असल्याचे त्या नमूद करत आहेत.
उमेदवारांचे पती धुडकु सपकाळे हे सामाजिक क्षेत्रात सक्रिय असून, विविध समाजोपयोगी उपक्रमांमुळे त्यांची स्वतंत्र ओळख आहे. सामाजिक कामाचा अनुभव आणि जनसंपर्काचा लाभ प्रभागाच्या विकासासाठी उपयोगात आणला जाईल, असा विश्वास व्यक्त करण्यात येत आहे.
दरम्यान, मीनाताई सपकाळे यांच्या प्रचाराचा शुभारंभ दिनांक ८ रोजी होणार आहे. महर्षी वाल्मिक पुतळा येथे नारळ वाहून प्रचाराची सुरुवात करण्यात येणार असून, त्यानंतर मेस्को माता नगर, हरिओम नगर, जैनाबाद परिसर, जुना असोदा रोड, दशरथ नगर, गोपाळपुरा, श्रीकृष्ण नगर व योगेश्वर नगर परिसरात भव्य रॅली काढण्यात येणार आहे.
सध्या मीनाताई सपकाळे या होम टू होम प्रचाराच्या माध्यमातून मतदारांशी थेट संवाद साधत आहेत. प्रत्येक घरात जाऊन नागरिकांच्या समस्या जाणून घेत, त्या सोडवण्यासाठी ठोस आराखडा राबवण्याची ग्वाही देत आहेत. “प्रभागाच्या विकासासाठी मला पुन्हा एकदा सेवा करण्याची संधी द्या,” असे आवाहन त्या मतदारांना करत आहेत.
अपक्ष उमेदवार म्हणून कोणत्याही पक्षीय दबावाशिवाय प्रभागातील प्रश्न मार्गी लावता येतील, असा विश्वास व्यक्त करत मीनाताई सपकाळे यांनी प्रभाग क्रमांक ३ च्या सर्वांगीण आणि शाश्वत विकासासाठी कटिबद्ध राहण्याची ठाम भूमिका मांडली आहे.
