जयपूर– देशाची स्वातंत्र्य चळवळ सुरू असताना ब्रिटिशांचे खबरे काँग्रेस पक्षाच्या वारशाबाबत प्रश्न उपस्थित करत आहेत, अशा शब्दांत राजस्थानचे मुख्यमंत्री अशोक गेहलोत यांनी काँग्रेसला लक्ष करणाऱ्या भारतीय जनता पक्षाला सुनावले आहे.
राजस्थानचे मुख्यमंत्री गेहलोत पक्षाच्या १३५ व्या वर्धापन दिनानिमित्त आयोजित कार्यक्रमात पक्षाच्या कार्यकर्त्यांना संबोधित करत होते. भारतीय राज्यघटनेला मोठा धोका निर्माण झाला असून लोकशाहीचा आवाज दडपला जात आहे, असेही गेहलोत म्हणाले. या वेळी त्यांनी काँग्रेस पक्षांच्या कामगिरीचा आढावा घेतला. त्यावेली त्यांनी भारतीय जनता पक्षाच्या टीकेला उत्तर दिले. ते म्हणाले की, ‘काँग्रेस पक्षाचा वारसा मोठा आणि मजबूत असून तो अभिमान वाटावा असा वारसा आहे. काँग्रेसच्या या वारशाबाबत संपूर्ण देशाने अभिमान बाळगायला हवा. असे असताना पंतप्रधान मोदी काँग्रेसच्या वारशाबाबत काय म्हणतात हे तुम्हाला माहीतच आहे. त्यांनी पंडित जवाहरलाल नेहरूंच्या वारशाबाबतही काय वक्तव्य केले आहे, ते तुम्हाला माहीत आहे.’
भारतीय जनता पक्षावर टीका करताना गेहलोत पुढे म्हणाले की, पंडित नेहरू यांचा वारसा हा बलिदानाचा आहे, देशासाठी तुरुंगात जाण्याचा आहे. माजी पंतप्रधान इंदिरा गांधी आणि राजीव गांधी देशासाठी शहीद झाले. हा वारसा आहे. आणि तुमच्या पक्षाच्या विचारधारेचे लोक स्वातंत्र्य चळवळीच्या वेळी ब्रिटिशांचे खबरे होते. असे लोक आज काँग्रेस पक्षाच्या वारशावर बोलत आहेत. ही शरमेची गोष्ट आहे.
देशातील सर्व लोकशाही प्रणालीतील संस्था उद्ध्वस्त केल्या जात आहेत. न्याय व्यवस्था, निवडणूक आयोग, सीबीआय, ईडी आणि आयकर विभागावर दबाव आहे, असे गेहलोत म्हणाले. पंतप्रधान कार्यालयाला विचारल्याशिवाय कोणतेही पाऊल उचलले जात नाही. सर्व निर्णय हे पंतप्रधान कार्यालयात घेतले जातात, असे सांग, देश कुठे चालला आहे असा सवाल, गेहलोत यांनी विचारला आहे.
