जळगाव,(प्रतिनिधी)- राज्याचे उपमुख्यमंत्री अजित पवार (Ajit Pawar) जळगाव जिल्हा दौऱ्यावर दिनांक २ फेब्रुवारी रोजी येतं असून अमळनेर येथे होत असलेल्या अखिल भारतीय मराठी साहित्य संमेलनाच्या उद्घघाटनासाठी उपस्थित राहणार आहेत.
दरम्यान चोपडा येथे १०० कोटी रुपये खर्च करून उभारण्यात आलेल्या सूतगिरणीचे उद्घाटन त्यांच्या हस्ते होणार आहे. तसेच त्यांच्या उपस्थित यावल येथे पक्षाचा मेळावा घेण्यात येणार असल्याची माहिती राष्ट्रवादी कॉंग्रेस अजित पवार गटाचे जिल्हाध्यक्ष संजय पवार यांनी दिली.
पवार म्हणाले की, अमळनेर येथे होत असलेल्या अखिल भारतीय मराठी साहित्य संमेलनाच्या उद्घघाटनासाठी २ फेब्रुवारीला येत आहेत. या कार्यक्रमानंतर ते चोपडा येथे घन:श्‍याम अग्रवाल यांनी शंभर कोटी रुपये खर्च करून उभारलेल्या शिवकृपा कॉटस्पीन या सूतगिरणीचा शुभारंभ त्यांच्या हस्ते होणार आहे. यामुळे परिसरातील चारशे लोकांना रोजगार उपलब्ध होणार आहे.तसेच यावल येथे राष्ट्रवादी कॉंग्रेस अजित पवार गटाचा मेळावाही होणार असल्याने तेथे ते उपस्थित राहणार आहे.
