Crime News : जळगाव जिल्ह्यातील यावल तालुक्यात पुन्हा खून झाल्याची घटना समोर आली आहे. रस्त्याच्या वादातून डोक्यात कुऱ्हाड घालून प्रौढाची हत्या केल्याची धक्कादायक घटना घडलीय. दरम्यान, २४ तासात तालुक्यात ही दुसरी घटना घडल्याने एकच खळबळ उडाली आहे.
मिळालेल्या माहितीनुसार, यावल तालुक्यातील रिधुरी गावात सोमवारी रात्री ८.३० वाजेच्या सुमारास घराच्या वापर रस्त्यावरून दोन कुटुंबांमध्ये वाद झाला. त्याचे रुपांतर हाणामारीत होऊन धनराज वासुदेव सोनवणे (५०) यांच्या डोक्यात कुर्‍हाडीने वार करण्यात आले. यात धनराज सोनवणे जागीच ठार झाले. तर सतीश सुखदेव सोनवणे (३०), आरती सतीश सोनवणे २८) हे गंभीर जखमी झाले असून त्यांच्यावर जळगाव येथे उपचार सुरू आहेत.
या प्रकरणी सोनी धनराज सोनवणे ( ३५ रा. रिधुरी ) यांनी फैजपूर पोलीस स्थानकात दिलेल्या फिर्यादीवरून संशयित आरोपी सतीश सुकदेव सोनवणे, युवराज सुकदेव सोनवणे व दीपक युवराज सोनवणे यांच्या विरोधात गुन्हा दाखल करण्यात आला असून त्यांना गजाआड करण्यात आले आहे. पुढील तपास सहायक पोलीस निरिक्षक निलेश वाघ हे करत आहेत. दरम्यान, यावल तालुक्यातच मुलानेच वडिलांची हत्या केल्याची घटना काल १५ रोजी समोर आली होती.
