पाचोरा,(प्रतिनिधी)- पाचोरा -भडगाव विधानसभा मतदारसंघाचे आमदार किशोर पाटील यांना मंत्रिपद मिळावे या मागणीसाठी पाचोरा येथे सोमवार ता 9 रोजी सायंकाळी पाच वाजता छत्रपती शिवाजी महाराज चौकातील महादेव मंदिरात महाअभिषेक करून महादेवाला साकडे घालण्यात आले. आमदार किशोर पाटील हे सलग दुसऱ्यांदा निवडून आले असून त्यांच्या अगोदर त्यांचे काका कै आर ओ तात्या पाटील यांनी 10 वर्ष आमदारकी उपभोगली आहे. गेल्या 25 वर्षांपासून या कुटुंबाचे राजकीय- सामाजिक क्षेत्रातील योगदान महत्त्वपूर्ण ठरले आहे.
गेल्या 5 वर्षांच्या आमदारकीच्या कार्यकाळात आमदार किशोर पाटील यांनी अत्यंत कल्पक व भव्य अशी 800 कोटी रुपयांची विकासकामे करून आपली विकासपुरुष म्हणून ओळख निर्माण केली आहे. पाचोरा- भडगाव तालुक्यात आतापर्यंत झाली नसतील अशी अत्यंत निकडीची विकास कामे केल्याने त्यांना जनतेने कार्यसम्राट या उपाधीने संबोधले आहे. त्यांना या वेळी मंत्रिपद मिळावे या मागणीसाठी शिवसेनेच्या पदाधिकारी व कार्यकर्त्यांनी वरिष्ठ नेत्यांपुढे विनंतीवजा गळ घातली असून सोमवार ता. 9 रोजी सायंकाळी छत्रपती शिवाजी महाराज चौकातील महादेव मंदिरात ढोल-ताशांच्या गजरात येऊन छत्रपती शिवाजी महाराज, बाळासाहेब ठाकरे यांचा जयघोष करत तसेच हर हर महादेवचा नारा लावत शिवसेना पदाधिकारी व कार्यकर्त्यांनी महादेव मंदिरात महाअभिषेक करून महादेवाला आमदारांच्या मंत्रिपदासाठीचे साकडे घातले.
अण्णा जोशी या पुरोहिताच्या मंत्रोच्चारात सुमारे 2 तास पंचामृताचा महाअभिषेक करण्यात आला गणरायाच्या आरतीने महाअभिषेकाची सांगता झाली.
या प्रसंगी नगराध्यक्ष संजय गोहिल, उपनगराध्यक्ष शरद पाटे, उद्योजक मुकुंद बिल्दीकर ,उपजिल्हाप्रमुख दिनकर देवरे ,गणेश पाटील, चंद्रकांत धनवडे, भरत खंडेलवाल, शहर प्रमुख किशोर बारावकर, बंडू चौधरी, नगरसेवक सतिष चेडे, शितल सोमवंशी, बापू हटकर, वाल्मीक पाटील, आनंद पगारे, राजेश पाटील, जितेंद्र पेंढारकर, संदीपराजे पाटील,पिंटु राजपूत, अनिल राजपूत,पप्पु जाधव, सुधाकर महाजन महेश पाटील बंडू सोनार, अनिकेत सूर्यवंशी ,योगेश पाथरवट, शरद पाटील, सुमित सावंत, पिंटू राजपूत,विजय भोई,नाना वाघ,वैभव राजपूत यांचेसह शिवसैनिक मोठ्या संख्येने उपस्थित होते. गणेश पाटील यांनी आभार व्यक्त केले.
मुस्लिम बांधवांनी देखील मशिदीत नमाज अदा करून अल्लाला साकडे घालण्याचा निर्धार केला तर काही कार्यकर्त्यांनी वैष्णो देवीच्या दर्शनासाठी जाण्याचे ठरविले. वाल्मिक पाटील यांनी पदयात्रेने शिर्डी येथे जाऊन साई बाबाच्या चरणी आमदार किशोर पाटील यांच्या मंत्रिपदासाठी साकडे घालण्याचे जाहिर केले. . यावेळी शिवसेनेचे पदाधिकारी व कार्यकर्ते प्रचंड उत्साह होते.
