भोपाळ । भोपाळहून दिल्लीला निघालेल्या वंदे भारत ट्रेनच्या एका डब्याला आज सोमवारी पहाटेच्या सुमारास अचानक आग लागली. या आग लागल्याचं कळताच लोको पायलटने तातडीने ट्रेन थांबवली. ही घटना बीना शहराजवळ घडली आहे.
ही ट्रेन राणी कमलापती रेल्वे स्टेशनवरून हजरत निजामुद्दीनसाठी सकाळी 5.40 वाजता निघाली होती. ही गाडी कल्हार स्थानकावरून जात असताना सी-14 कोचच्या बॅटरी बॉक्समधून धूर निघत असल्याचे स्थानक व्यवस्थापकाला दिसले. याबाबत त्यांनी रेल्वेच्या वरिष्ठ अधिकाऱ्यांना माहिती दिली. माहिती मिळताच कुरवई-कथोरा स्थानकात गाडी थांबवण्यात आली. अग्निशमन दलाच्या जवानांच्या मदतीने सकाळी ७.५८ पर्यंत आग आटोक्यात आणण्यात आली.
#WATCH | Madhya Pradesh | A fire was reported in battery box of one of the coaches in a Vande Bharat Express at Kurwai Kethora station. Fire brigade reached the site and extinguished the fire. All passengers are safe. No injuries reported. The fire is limited to Battery Box Only.… pic.twitter.com/E2s9ED99VH
— ANI MP/CG/Rajasthan (@ANI_MP_CG_RJ) July 17, 2023
अशा प्रकारे आगीवर नियंत्रण मिळवण्यात आले
भोपाळ-हजरत निजामुद्दीन वंदे भारत क्रमांक 20171 या ट्रेनच्या डब्याच्या बॅटरी बॉक्समध्ये सोमवारी सकाळी आग लागली. बॅटरी बॉक्स प्रवाशांच्या क्षेत्रापासून दूर कोचच्या खाली स्थित आहे. आग लागताच इलेक्ट्रिकल सेफ्टी सिस्टीमने बॅटरीज डिस्कनेक्ट केल्या होत्या. बॅटरी काढून आग विझवण्यात आली. त्यावेळी कोचमध्ये 20-22 प्रवासी असल्याने त्यांना तातडीने दुसऱ्या डब्यात हलवण्यात आले. या घटनेत कोणीही जखमी झाल्याचे वृत्त नाही.
