चेन्नई – फिल्मी दुनियेवर अधिराज्य गाजवणारे रजनीकांत आता राजकारणात उतरण्याच्या तयारीत आहेत. २०२१मध्ये होणाऱ्या विधानसभा निवडणुकीत तामिळनाडूतील जनता चमत्कार घडवेल, असा विश्वास रजनीकांत यांनी व्यक्त केला आहे. रजनीकांत यांनी केलेल्या या वक्तव्यामुळे ते पुढच्या वर्षी नव्या पक्षाची घोषणा करण्याची दाट शक्यता आहे. रजनीकांत यांनी अभिनेते आणि राजकारणी कमल हसन यांच्यासोबत जाण्याचेही संकेत दिले आहेत.
रजनीकांत यांनी नवीन पक्ष स्थापन करण्याची तयारी जोरात सुरू केली आहे. नव्या पक्षाची धोरणं आणि उद्देश्यांना अंतिम स्वरुप देण्याचं काम वेगानं सुरू आहे. नव्या पक्षाची घोषणा केल्यानंतर रजनी मक्कल मंदरम या रजनीकांत यांच्या फॅन क्लबचं नामांतर करण्यात येणार आहे. डीएमके नेते एम. करुणानिधी आणि एआयएडीएमकेच्या महासचिव जयललिता यांचं निधन झाल्यानंतर राज्यात निर्माण झालेली राजकीय पोकळी भरून काढण्यासाठी रजनीकांत उत्सुक असून त्या दिशेने त्यांनी काम सुरू केल्याचं रजनीकांत यांच्या निकटच्या सूत्रांनी सांगितलं.
रजनीकांत यांनी भविष्यात मक्कल नीधि मय्यमचे नेते कमल हसन यांच्यासोबत येण्याचे संकेतही दिले आहेत. रजनीकांत आणि माझी ४४ वर्षांपासूनची मैत्री आहे. गरज पडल्यास तामिळनाडूच्या विकासासाठी दोघेही एकत्र येऊ शकतात, असं कमल हसन यांनीही दोन दिवसांपूर्वी म्हटलं होतं. तर रजनीकांत यांनी भाजपसोबत जाणार नसल्याचं स्पष्ट केलं होतं. भाजपने माझं भगवेकरण थांबवावं, असंही त्यांनी म्हटलं होतं. दरम्यान, कमल हसन यांच्या पक्षाने तामिळनाडूतील पोटनिवडणुका लढवल्या होत्या. मात्र त्यांना फारसं यश आलं नव्हतं.
