मुंबई: एकाच मांडवात दोन बहिणींनी एकाच तरुणासोबत लग्न केलेल्या लग्नाचा व्हिडीओ तुफान व्हायरल झाला. मोठ्या थाटामाटात, गाजावाजा करत अतुलचं आणि रिंकी-पिंकीचं लग्न पार पडलं. पण तिघांचा संसार फुलण्यापूर्वीच लग्नाच्या दुसऱ्याच दिवशीच त्यांच्या आनंदावर विरजण पडलंय. जुळ्या बहिणींशी एकाच मांडवात लग्न करणं नवरदेव अतुल आवतडेच्या चांगलंच अंगलट आलं आहे.
मुंबई येथे राहणाऱ्या जुळ्या बहिणींना लहानपणापासून एकत्र राहण्याची सवयच लागल्यामुळे दोघांनीही आयुष्याचा साथीदार हा एकच निवडला आहे. या तिघांचा विवाह सोलापूरच्या युवकासोबत अकलूज येथे पार पडला. गजब कहाणीतून प्रेम निर्माण झाल्यामुळे अजब लग्न पार पडले. या लग्नाचे फोटो मोठ्या प्रमाणात व्हायरल झाले. त्यानंतर आता या युवकावर पोलीस ठाण्यात गुन्हा दाखल झाला आहे. इतकेच नाही तर या प्रकरणाची दखल घेत राज्य महिला आयोगाच्या अध्यक्षा रूपाली चाकणकर यांनी सोलापूर पोलीस अधीक्षकांना कारवाईचे आदेश दिले आहेत.
दोघा बहिणींनी केले एकाच मुलाशी लग्न
या जुळ्या बहिणी रिंकी आणि पिंकी दोन्ही आयटी इंजिनिअर आहेत. मुंबईत राहतात. काही दिवसांपूर्वी त्यांच्या वडिलांचे निधन झाले. सहा महिन्यांपूर्वी रिंकी, पिंकी व आई आजारी पडल्या होत्या. यावेळी अंधेरी येथे राहणाऱ्या अतुल या टॅक्सी ड्रायव्हरने तिघींना रुग्णालयात उपचारासाठी दाखल केले. तिघींच्या कुटुंबात पुरुष नसल्याने माणुसकीच्या नात्याने अतुलने तिघींची रात्रंदिवस सेवा केली. यामुळे तिघींना अतुलविषयी आपुलकी निर्माण झाली. यातूनच जुळ्या बहिणींतील एकीचे प्रेम हे अतुलबरोबर जडले, पण दोघींनी एकमेकींना कधीच सोडले नसल्याने त्या विभक्त होऊन राहू शकत नसल्याने दोघींनी अतुलशी विवाह करण्याचा निर्णय घेतला.
सोलापूरात गुन्हा दाखल
माळेवाडी-अकलूज येथे एकाच वेळी दोन वधूंशी विवाह केल्याप्रकरणी वराविरुद्ध अकलूज पोलिस ठाण्यात तक्रार दाखल झाली असून, अकलूज पोलिसांनी 1960 च्या कलम 494 नुसार द्विभार्या प्रतिबंधक कायद्यांतर्गत गुन्हा दाखल केला आहे. अतुल आवताडे याने जुळ्या बहिणींशी एकाच वेळी विवाह करून द्विभार्या प्रतिबंधक कायद्याचे उल्लंघन केले म्हणून माळेवाडी-अकलूज येथीलच राहुल फुले या युवकाने अकलूज पोलीस स्टेशन येथे तक्रार दाखल केली.
