पाचोरा : महिंद्रा पिकअपने दिलेल्या धडकेत दुचाकीस्वार २० वर्षीय तरुणाचा जागीच मृत्यू झाल्याची घटना आज गुरुवारी नेरी ते भामरे दरम्यान, घडली आहे. तेजस सुरेश महेर (वय – २० ) असे मृत तरुणाचे नाव आहे. दरम्यान, तेजस याचे सैन्यात भरती होवून देशसेवा करण्याचे स्वप्न अपूर्ण राहिले आहे. या घटनेमुळे त्याच्या कुटुंबाला धक्काच बसला आहे.
याबाबत असे कि, तेजस महेर हा कन्नड तालुक्यातील नागद गावाजवळील पांगरे या छोट्याशा गावात राहत होता. तेजसला सैन्यात भरती होवून देशसेवा करण्याचे स्वप्न असल्याने त्याने सैन्यात भरती होण्यासाठी जळगांव येथे गुरुकुल अकॅडमीत प्रवेश घेतला होता. अकॅडमीत सैन्यभरती पूर्व परीक्षाचा शेवटचा पेपर देवून दि. ६ एप्रिल रोजी तेजस हा पाचोरा तालुक्यातील लोहटार येथे मुक्कामी थांबला होता.
दि. ७ एप्रिल रोजी गुरुवारी सकाळी लोहटार येथून नातेवाईकांची मोटारसायकल घेऊन पांगरे ता. कन्नड येथे जात असतांना चाळीसगाव तालुक्यातील भामरे गावाजवळ मालवाहू महिंद्रा पिकअप या चारचाकी वाहने मागवून त्यास जोरदार धडक दिली. वाहनाच्या जोरदार धडकेने तेजस हा जागेवर कोसळल्याने त्याच्या डोक्याला गंभीर मार लागला आणि तो जागेवरच ठार झाला. अपघाताची माहिती मिळताच भामरे गावातील काही नागरीकांनी घटनास्थळी धाव घेऊन चारचाकी वाहन चालकास चांगलाच चोप देऊन तेजस महेर यांचेकडील असलेल्या मोबाईल वरून त्याचे बहिणीला फोन केल्यानंतर मयताची ओळख पटली.
