जळगाव: शिवसेनेचे मंत्री गुलाबराव पाटील यांच्यावर कोरोना काळात साहित्य खरेदीत भ्रष्टाचाराचा आरोप झाल्याने खळबळ उडाली आहे. एवढंच नव्हे तर जिल्हाधिकारी अभिजित राऊत यांच्यासह तत्कालीन जिल्हा शल्यचिकित्सक, जिल्हा आरोग्याधिकारी यांच्यासह अनेक अधिकाऱ्यांचा समावेश असल्याचाही आरोप तक्रारदाराने केला आहे. याप्रकरणी माहिती तक्रारदार आणि माहिती अधिकार कार्यकर्ते दिनेश भोळे यांना पोलिसांकडूनही दाद न मिळाल्याने अखेर जिल्हा न्यायालयात केलेल्या तक्रारीवरून न्यायालयाने प्राथमिक चौकशीचे आदेश दिले आहेत. याबाबतची माहिती दिनेश भोळे तसेच भाजपच्या जिल्हा परिषद सदस्या भाजपच्या माधुरी अत्तरदे यांनी पत्रकार परिषदेत दिली.
काय आहे प्रकरण?
तक्रार माहिती अधिकार कार्यकर्ते दिनेश भोळे यांनी कोरोना काळामध्ये व्हेंटिलेटरसह इतर आरोग्यविषयक साहित्य खरेदीत घोटाळा झाल्याबाबतची तक्रार जिल्हाधिकारी अभिजित राऊत यांच्याकडे केली होती. या तक्रारीनुसार चौकशी समितीही गठीत करण्यात आली होती. चौकशी समितीच्या अहवालात या प्रकरणात संबधितांना क्लिनचीट मिळाल्यामुळे तक्रारदार दिनेश भोळे यांनी जिल्हापेठ पोलिसात तक्रार केली होती. जिल्हापेठ पोलिसांतही याप्रकरणी गुन्हा दाखल झाला नाही. तब्बल तीन महिन्यांपासून तक्रार करूनही त्याला केराची टोपली दाखवण्यात आल्याने अखेर भोळे यांनी जिल्हा न्यायालयाकडे दाद मागितली. या प्रकरणी कामकाज होऊन जिल्हा न्यायालयाने १ एप्रिल रोजी याप्रकरणी पोलीस विभागाला प्राथमिक चौकशीचे आदेश दिले आहेत.
राष्ट्रवादी काँग्रेसचे ज्येष्ठ नेते एकनाथराव खडसे यांनीही या घोटाळ्याबाबत पत्रकारांशी बोलताना माहिती दिली. तसेच हा गंभीर स्वरुपाचा घोटाळा असून त्याचे नि:पक्षपातीपणे चौकशी व्हावी अशी मागणी एकनाथ खडसे यांनी व्यक्त केलीय.
