जळगाव : पतंग उडवण्यासाठी वापरल्या जाणार्‍या नायलॉन मांजा निर्मितीसाठी पक्क्या धाग्याची निर्मिती, आयात करणे, विक्री, साठवणूक व वापर करण्यास जळगाव जिल्ह्यात कायमस्वरूपी बंदी घालण्यात आली. या मांजाची खरेदी, विक्री करू नये, असे आदेश जिल्हाधिकारी अभिजित राऊत यांनी दिले आहेत.
शासनाने घातली बंदी
पक्ष्यांना प्राणघातक ठरणारा मांजा पतंग उडवण्यासाठी मोठ्या प्रमाणात वापरला जातो. या मांजावर शासनाने बंदी घातली आहे. त्याची विक्री करणे, साठवणे व वापरणे हा कायद्यान्वये गुन्हा आहे. अशा व्यक्ती अथवा व्यापार्‍यांविरुद्ध कारवाईची मोहीम वन विभागातर्फे सुरू केली आहे.
विशेषत: मकरसंक्रांत या सणाच्या व इतर वेळेस पतंग उडवण्यासाठी नायलॉन मांजा वापरला जातो. मात्र, नायलॉन मांजाची विक्री व साठवणूक रोखण्यासाठी सर्व स्थानिक संस्था व पोलिस विभागाने स्वतंत्ररीत्या पथके तयार करून आवश्यक ती कारवाई करावी. या आदेशाचे कोणतीही व्यक्ती, संस्थेने उल्लंघन केल्यास ही बाब पर्यावरण (संरक्षण) अधिनियमान्वये शिक्षेस पात्र राहील, असेही जिल्हाधिकारी राऊत यांनी म्हटले आहे.
