अहमदनगर : जामखेड तालुक्यातील आपटी या ठिकाणी एकाच दिवशी दोघांच्या आत्महत्येची घटना घडली आहे. यामध्ये अल्पवयीन मुलीचा आणि मुलाचा समावेश आहे. अशोक बंडु कडु (वय १७, रा. आपटी) व आशा उर्फ अश्विनी गोपीनाथ घुले (वय १६, रा.घोडेगाव, ता. जामखेड) अशी आत्महत्या केलेल्या दोघांची नावे आहेत. याप्रकरणी जामखेड पोलिस ठाण्यात अकस्मात मृत्यूची नोंद करण्यात आली आहे. दरम्यान, एकाच दिवशी दोघांनी आत्महत्या केल्याने तालुक्यात एकच खळबळ उडाली असून दोघांनी आत्महत्या का केली याबाबत अद्यापही माहिती समजु शकलेली नाही.
बुधवार दि. २४ रोजी जामखेड तालुक्यातील आपटी या ठिकाणी आशा घुले हीने दुपारी बारा ते एकच्या दरम्यान मामाच्या घरी गळफास घेऊन आत्महत्या केली. त्यानंतर दुसरी घटना ही त्याच गावात घडली असून अशोक याने दुपारी व्हॉटसअॅपवर मी माझे जीवन संपवत आहे असा स्टेट्स ठेवला. आणि त्यानेही काही तासातच शेतातील झाडाला गळफास घेऊन आत्महत्या केल्याची घटना घडली आहे. आत्महत्येची घटना का घडली याची माहिती अद्याप समोर आली नसून पोलीस अधिक तपास करीत आहेत.
घटनेची माहिती समजताच घटनास्थळी पोलीस निरीक्षक संभाजी गायकवाड, सपोनि सुनिल बडे, पोना संभाजी शेंडे, पोकॉ. शशी म्हस्के व पोकॉ संजय जायभाय यांनी भेट दिली. याप्रकरणी पोलीस स्टेशनला अकस्मात मृत्यूची नोंद करण्यात आली आहे.
