कोल्हापूर : राज्यात सातत्याने महिला, मुलींवर अत्याचाराच्या घटना घडत आहेत. त्यांच्या हत्या होत आहेत. दरम्यान, आता कोल्हापूरच्या हातकणंगले तालुक्यातील खोची येथील एक संतापजनक घटना समोर आली आहे. एका सहा वर्षाच्या चिमुकलीची अत्याचार करुन तिची निर्घृण हत्या केल्याची संतापजनक घटना उडकीस आली आहे. ही चिमुकली रविवारच्या दुपारपासून बेपत्ता होती. पोलिसांनी या प्रकरणातील संशयिताला ताब्यात घेतलं आहे.
याबाबत असे की, कोल्हापुरातील हातकणंगले तालुक्यातील खोची गावातील दफनभूमीजवळ झुडपात एका सहा वर्षांच्या मुलीचा मृतदेह आढळून आला. ही मुलगी रविवारच्या दुपारपासून बेपत्ता होती. ती सापडली ती मृतावस्थेतच. या चिमुकलीवर अत्याचार करुन तिची हत्या केल्याचं पोलिसांच्या निदर्शनास आलं. त्यानंतर पोलिसांनी तपासाची चक्रे फिरवली आणि या घटनेतील संशयित आरोपी प्रदीप पोवार याला ताब्यात घेतलं. पोलीस या प्रकरणाचा पुढील तपास करत आहेत.
या चिमुकलीचे आई-वडील शेतात मोलमजुरी करतात. आपल्या पोटच्या मुलीचा कुणीतरी खून केला हे कळताच या आई-वडिलांच्या डोक्यावर दुःखाचा डोंगर कोसळला आहे.
