जळगाव : मागील काही महिन्यांमध्ये खाद्य तेलांच्या किंमतीत प्रचंड वाढ झाली आहे. यामुळे गृहिणींचे किचन बजेट कोलमडून गेले आहे. परंतु सणासुदीच्या पार्श्वभूमीवर सोयाबीन तेलाचे भाव १० रुपयाने कमी झाले आहे. यामुळे गृहिणीना काहीसा दिलासा मिळाला आहे. सध्या सोयाबीन तेलाचे दर १४५ रुपये प्रति किलोवर आले आहेत.
गेल्या अनेक दिवसांपासून खाद्यतेलाच्या भावात वाढ होऊन महागाईचा चांगलाच तडाखा बसला. खाद्यतेलाच्या कच्च्या मालाचे भाव वधारण्यासह अमेरिकन डॉलरचेही दर वधारत असल्याने त्याचा खाद्यतेलाच्या भावावर परिणाम होऊन त्याच्या भावात चांगलीच वाढ होत गेली.
यात घरोघरी व खाद्यपदार्थांच्या व्यवसायासाठी वापरण्यात येणाऱ्या सोयाबीन तेलाचे भाव कधीपासूनच शंभरी पार जाऊन हळूहळू ते १५० रुपयांच्या पुढे पोहोचले. सोयबीनचे भाव वाढल्याने तेलातही भाववाढ झाली होती. मात्र आता सोयाबीनचे भाव गडगडले व तेलाचेही भाव कमी होण्यास मदत होत गेली.
तेलाचे दर (प्रति किलो)
तेल-ऑगस्ट-सप्टेंबर
सोयाबीन-१५५-१४५
सूर्यफूल-१६५-१६०
पामतेल-१३८-१३०
शेंगदाणा-१९०-१८०
तीळ-२००-२००
