पुणे : गावी जाण्यासाठी पुणे रेल्वे स्थानकावर आलेल्या एका १४ वर्षीय अल्पवयीन मुलीचे अपहरण करून सात ते आठ जणांच्या टोळक्याने तिच्यावर सामूहिक बलात्कार केल्याचा संतापजनक प्रकार उघडकीस आला आहे. या प्रकरणी सर्व आरोपींना अटक करण्यात आली आहे. धक्कादायक म्हणजे, आरोपींमध्ये दोन रेल्वे कर्मचाऱ्यांचाही समावेश आहे. या प्रकरणी पुण्यातील वानवडी पोलिस ठाण्यात गुन्हा दाखल करण्यात आला आहे.
याबाबत १४ वर्षीय पीडित मुलीने तक्रार दिली आहे. पोलिसांनी दिलेल्या माहितीनुसार, 31 ऑगस्ट ते 1 सप्टेंबर या कालावधीत वानवडी पोलीस स्टेशनच्या हद्दीत हा प्रकार घडला. पीडित मुलगी गावी जाण्यासाठी रेल्वे स्थानक परिसरात आली होती. मात्र, आता कोणतीही गाडी नाही, तू गावी कशी जाणार, असे म्हणत आम्ही तुझी राहण्याची व्यवस्था करतो, असे आरोपींनी सांगून तिला बाहेर आणले. रिक्षातून तिला वानवडी परिसरात नेले. त्या ठिकाणी आरोपींनी तिच्यावर बलात्कार केला.
तसेच, दुसऱ्या दिवशी देखील तिच्यावर बलात्कार करण्यात आला. एकूण सात ते आठ आरोपींनी तिच्यावर बलात्कार केला. हा प्रकार काल उघडकीस आला आहे. त्यानंतर वानवडी पोलिसांनी तात्काळ या आरोपींचा शोध घेत त्यांना अटक देखील केली आहे. आरोपींमध्ये काही रिक्षा चालक आहेत.
या घटनेमुळं तिच्यावर मोठा मानसिक आघात झाला आहे. तिच्या उपचारासाठी सर्व प्रकारचे सहकार्य केलं जात असल्याचं वरिष्ठ पोलीस निरीक्षकांनी सांगितलं.
