मुंबई,(प्रतिनिधी)- एका गुन्हेगाराला पाठीशी घालण्याकरिता प्रयत्न होतं असून देवेंद्र फडणवीस यांच्यासह इतरांवर पोलिसांवर दबाव आणला म्हणून सरकारी कामात अडथळा आणल्या प्रकरणी गुन्हा दाखल करून थेट अटक करण्याची मागणी राष्ट्रवादी काँग्रेस पक्षाच्या महिला प्रदेशाध्यक्ष रुपाली चाकणकर यांनी ट्विट करून केली आहे.
रुपाली चाकणकर यांनी ट्विट करून म्हटलं आहे की, काल रात्री देवेंद्र फडणवीस आणि त्यांच्या काही साथीदारांनी मिळून पोलिसांवर दबाव निर्माण करून एका गुन्हेगाराला पाठीशी घालण्याचा प्रयत्न केला. वास्तविक पाहता, गुन्हा करणारा जितका दोषी असतो तितकाच दोषी गुन्हेगाराला पाठीशी घालणारा असतो. दोन्ही आरोपींना एकच शिक्षा असते,त्यामुळे सरकारी कामात अडथळा आणून त्रास दिल्याबद्धल पोलीसांनी फडणवीस आणि त्यांच्या साथीदारांवर गुन्हा दाखल करून अटक करावी अशी मागणी केली असून चुकीला माफी नाही असं देखील म्हटलं आहे.
नेमकं काय आहे प्रकरण…
रेमडेसीवरच्या साठेबाजी करण्याच्या संशयावरून ब्रुक्स फार्मा कंपनीचे मालक राजेश डोकानिया यांना पोलिसांनी ताब्यात घेतल्यानंतर राज्याचे विरोधी पक्षनेते देवेंद्र फडणवीस आणि विधान परिषदेचे विरोधी पक्षनेते प्रवीण दरेकर यांनी मध्यरात्रीच पोलीस ठाणे गाठले होते.यावेळी देवेंद्र फडणवीस पोलिसांवर अक्षरश: भडकले होते. फडणवीस तावातावाने जाब विचारत होते, तर पोलीस त्यांना समजावण्याचा प्रयत्न करत होते. यावरून आज दिवसभर राजकीय वातावरण तापल्याचे दिसून आले. यामुळेच महाविकास आघाडीच्या नेत्यांकडून देवेंद्र फडणवीस यांच्यावर सरकारी कामात अडथळा आणल्या प्रकरणी गुन्हा दाखल करावा अशी मागणी लावून धरल्या जात आहे.
