जळगाव, दि.9 (प्रतिनिधी) – ओम साई रिअल इस्टेट चे संचालक रमेशकुमार मुणोत यांनी पत्नी सौ.माया मुणोत यांच्या समवेत आज दि.9 मार्च रोजी कांताई नेत्रालयात कोरोना व्हॅक्सीनेशन सेंटर येथे जाऊन कोरोना लस टोचून घेतली. लस घेतल्यानंतर दोघांनी सेल्फी देखील काढला व कोरोना लसीकरणासाठी पात्र असलेल्या सर्वांनी कोरोना लस घेण्याचे अवाहन यावेळी केले आहे.
महाराष्ट्रासह देशभरात कोव्हिडं सशुल्क लसीकरणाचा दुसरा टप्पा १ मार्चपासून सुरू झाला आहे. यात शासनाने शहरात लसीकरणासाठी विविध सेंटर जाहीर केले आहे यात जळगाव येथील कांताई नेत्रालय यांनाही अधिकृत कोरोना व्हॅक्सीनेशन सेंटर चा दर्जा दिला असून या केंद्रात लसीकरणाची सुरुवात करण्यात आली आहे.या ठिकाणी सर्व सुविधा उत्तम असल्याने लसीकरणास उत्तम प्रतिसाद मिळत आहे.
कांताई नेत्रालयात या लसीकरणासाठी 3 बूथ तयार करण्यात आले असून, कांताई नेत्रालयाच्या आवारात अत्याधुनिक सोयींनी सुसज्ज आणि स्वतंत्र लसीकरण विभाग तयार करण्यात आला आहे. नोंद केलेल्या नागरिकांना बसण्याची व्यवस्था करण्यात आली असून, जेष्ठ नागरिकांसाठी विशेष सोय करण्यात आली आहे, उत्तम प्रशिक्षित वैद्यकीय कर्मचाऱ्यांची नेमणूक करण्यात आली आहे.
शासनाच्या मार्गदर्शक सूचनांनुसार शासनाने ठरवून दिलेल्या व्यवस्थेनुसार व दरानुसार या लसीकरण केंद्रात कोरोना प्रतिबंधक लस देण्याची व्यवस्था करण्यात आली
आहे.जैन उद्योग समूहाचे अध्यक्ष अशोक जैन यांनी जळगावकरांसाठी सुविधा उपलब्ध करुन दिल्यामुळे त्यांचेही रमेशकुमार मुणोत यांनी आभार व्यक्त केले आहे.
