जळगाव (प्रतिनिधी): येथील शासकीय वैद्यकीय महाविद्यालय व रुग्णालयात गुरुवारी ३१ डिसेंबर रोजी सकाळी ९ ते १ या वेळेमध्ये ज्येष्ठ नागरिकांना वयाचा दाखला मिळण्याबाबतची कार्यवाही केली जाणार असून संबंधितांनी उपस्थिती द्यावी असे आवाहन करण्यात आले आहे.
शासकीय वैद्यकीय महाविद्यालय व रुग्णालय हे कोरोनाव्यतिरिक्त आजारांवर उपचारासाठी खुले झाल्यापासून वयाचा दाखला आणि दिव्यांगांना प्रमाणपत्र मिळणे बाबतची कार्यवाही सुरू झाली आहे.
त्यानुसार दर गुरुवारी वयाचा दाखला काढण्याबाबत कार्यवाही केली जात आहे. यासाठी वय वर्षे साठ व त्यावर असणार्या नागरिकांना हा दाखला मिळतो. याकरिता वय सिद्ध करणारे कागदपत्र उदाहरणार्थ, आधार कार्ड, रेशन कार्ड, शाळेचा दाखला, जुने कागदपत्र तसेच दोन फोटो ही कागदपत्रे लाभार्थ्याकडे असणे आवश्यक आहे. सकाळी केस पेपर काढून ९ ते १ या वेळेत कक्ष क्रमांक ११३ येथे वयाचा दाखला मिळण्याबाबत कार्यवाही केली जाणार आहे. लाभार्थ्यांनी वेळेत उपस्थिती द्यावी असे आवाहन रुग्णालयातर्फे करण्यात आले आहे.
