जळगाव, (प्रतिनिधी) – काल भाजप आमदार गोपीचंद पडळकर यांनी पंढरपूरात पत्रकार परिषदेत बोलतांना राष्ट्रवादी काँग्रेसचे राष्ट्रीय अध्यक्ष शरद पवार यांच्यावर खालच्या पातळीवर टीका केल्याने राष्ट्रवादी युवक काँग्रेसच्या पदाधिकाऱ्यांनी पडळकरांच्या पुतळ्याचे दहन करून निषेध नोंदवला.
खरंतर अशा प्रकारची घाणेरडी टीका करण्याची परंपरा महाराष्ट्रात नाही. स्व.यशवंतराव चव्हाण, वसंतदादा पाटील,एस.एम.जोशी सारख्या सुसंस्कृत व संयमी नेत्यांच्या राजकारणाने हा महाराष्ट्र उभा राहिलेला आहे. शिवाय ज्या पवारसाहेबांवर पडळकरसारखा दीडदमडीचा भाजप आमदार आपली लायकी विसरून जेवढं त्याचं वय आहे तेवढी राजकीय कारकीर्द असणाऱ्या राष्ट्रीय, आंतरराष्ट्रीय पातळीवर महाराष्ट्राचं प्रतिनिधित्व करत राज्याला अभिमान वाटावा असं काम करणाऱ्या उत्तुंग व्यक्तिमत्त्व पवारसाहेबांवर टीका करतो हेच मुळात संतापजनक असल्याचे युवक महानगर अध्यक्ष अभिषेक पाटील म्हणाले.
निषेध म्हणून आज राष्ट्रवादी काँग्रेस जळगाव महानगरतर्फे जळगावात आ.पडळकरविरोधात निषेध करण्यात आला, व गुन्हा दाखल करण्याची मागणी करण्यात आली. तसेच यावेळी पडळकर जोवर माफी मागत नाही तोवर जिल्ह्यात पाय ठेवू देणार नाही असा इशारा देण्यात आला.
