धुळे,(प्रतिनिधी): बऱ्याचदा सासरच्या मंडळीकडून, पतीकडून होणाऱ्या त्रासाने महिला टोकाची भूमिका घेताणांच्या बातम्या तुम्हाला ऐकायला मिळतात मात्र आज पत्नीकडून सतत होणाऱ्या त्रासाला कंटाळून पतीने गळफास घेत आत्महत्या केल्याची धक्कादायक घटना धुळे जिल्ह्यातून समोर आली आहे.
सविस्तर माहिती अशी की धुळे तालुक्यातील नवे भदाणे गावात २६ जानेवारी रोजी गोकूळ श्रावण श्रीराम (वय २४) यांनी गळफास घेत आत्महत्या केली.याप्रकरणी मयताचा भाऊ गोपाल श्रावण श्रीराम (वय २०, रा. नवे भदाणे, ता. धुळे) याने फिर्याद दाखल केली असून त्यानुसार, भाऊ गोकूळ श्रीराम आणि अंजली यांच्यात किरकोळ कारणावरून सतत वाद होत असायचे. पत्नीकडून पतीला त्रास दिला जात होता. सतत पैशांची मागणी करणे, खोटा गुन्हा दाखल करण्याची धमकी देणे असे प्रकार सुरू होते. सततच्या जाचाला कंटाळून शेवटी गोकूळ श्रीराम याने २६ जानेवारी रोजी गळफास लावून आपले जीवन संपविले. आत्महत्येचा प्रकार लक्षात येताच त्याला हिरे वैद्यकीय महाविद्यालयात दाखल करण्यात आले. डॉक्टरांनी तपासून मयत घोषीत केले.
मयताचे भाऊ गोपाल श्रीराम याने धुळे तालुका पोलिस स्टेशनला सोमवारी फिर्याद दिली. त्यानुसार, संशयित अंजली श्रीराम हिच्या विरोधात भादंवि कलम ३०६ प्रमाणे गुन्ह्याची नोंद करण्यात आली.
