यंदाचे २०२४ वर्ष महत्त्वपूर्ण आहे. आता रामराज्य येत आहे कारण श्रीरामलल्ला अयोध्येतील श्रीराम मंदिराच्या गर्भगृहात विराजमान होणार आहेत. तिथे २२ जानेवारीला प्राणप्रतिष्ठा सोहळा आहे. तसेच यंदा सार्वत्रिक निवडणुका होतील. या सर्व गोष्टी शुभ आहेत, देशातील नागरिकांसाठी हा महत्त्वाचा क्षण आहे, असे रामजन्मभूमीवरील श्रीरामाच्या मंदिराचे मुख्य पुजारी आचार्य सत्येंद्र दास यांनी मुलाखतीत सांगितले.
आचार्य सत्येंद्र दास म्हणाले की, देशात केवळ शांतता पर्व नव्हे तर रामराज्य येत आहे. मी सर्वांना नवीन वर्षाच्या शुभेच्छा देत आहे. नवीन वर्षात खूप काही चांगल्या गोष्टी घडणार आहेत. मुलाखत दिल्यानंतर ते जुन्या मंदिरात आरतीसाठी रवाना झाले. तिये रामलल्लाला छप्पन भोग, प्रसाद अर्पण करण्यात आला, भोग आरती ही दुपारी केली जाते. होळी, रामनवमी, वसंतपंचमी, नवीन वर्ष, प्रजासत्ताक दिन, स्वातंत्र्य दिन अशा विशेष दिवशी रामलल्लाला छप्पन भोग अर्पण केला जातो, अशी अनेक वर्षाची परंपरा आहे.
मुख्य पुजारी आचार्य सत्येंद दास म्हणाले की, रामजन्मभूमीवर राममंदिर बांधल्यानंतरच शहरात शांतता प्रस्थापित होईल, अयोध्येमध्ये विकास होत आहे. नवे विमानतळ, नवीन रेल्वेस्थानक बांधण्यात आले आहे. रामपथासारखे आणखी अनेक मार्ग बांधले तसेच विकास प्रकल्प राबविले जाणार आहेत. त्यामुळे अयोध्यानगरी भव्य रूप धारण करणार आहे. राम मंदिरात दर्शनासाठी येणाऱ्या असंख्य भक्तांना सर्व सुविधा उपलब्ध व्हाव्यात यासाठी ही कामे सुरू आहेत.
