मुक्ताईनगर : राष्ट्रवादी काँग्रेसतर्फे आज मुक्ताईनगर येथे आज जन आक्रोश मोर्चाचे आयोजन करण्यात आले होते. मात्र यादरम्यान, राष्ट्रवादीचे ज्येष्ठ नेते एकनाथराव खडसे यांची कन्या रोहिणी खडसे या भाषण करत असताना एक धक्कादायक प्रकार घडला. त्यांचे भाषण सुरू असतानाच एका शेतकऱ्याने पेट्रोल टाकून आत्मदहनाचा प्रयत्न केला. यामुळे एकच गोंधळ उडाला.
शेतकऱ्यांच्या विविध मागण्यांसाठी आज मुक्ताईनगर येथे जिल्हाध्यक्ष रविंद्र पाटील, राष्ट्रवादीच्या नेत्या रोहिणी खडसे यांच्या नेतृत्वाखाली जन आक्रोश मोर्चाचे आयोजन करण्यात आले होते.
कापसाला १५ हजार प्रती क्विंटल भाव मिळावा, केळी पिक विम्यातील जटिल अटी रद्द कराव्या, केळी उत्पादक शेतकऱ्यांना अनुदान मिळावे , अशा विविध मागण्यासाठी मोर्चाचे आयोजन करण्यात आले होते. या मोर्चात केळीचे खोड, कांद्याच्या माळा, कापूस व राष्ट्रवादी काँग्रेस पक्षाचे झेंडे लावून बैलगाड्या सहभागी झाल्या होत्या. तसेच हजारो कार्यकर्ते व शेतकरी बांधव देखील मोठ्या संख्येने उपस्थित होते.
यावेळी उपस्थितांना संबोधित करताना रोहिणी खडसे म्हणाल्या भाजपाचे केंद्र सरकार व राज्यातील शिवसेना शिंदे गट व भाजपा सरकारने शेतकऱ्यांच्या प्रश्नाकडे साफ दुर्लक्ष केलेले असून शेतकऱ्यांच्या प्रश्नांवर हे सरकारकुंभाकर्णी झोपेचे सोंग घेत आहे, अशी टीका केली. यादरम्यान, रोहिणी खडसे यांचे भाषण सुरू असतानाच एका शेतकऱ्याने पेट्रोल टाकून आत्मदहनाचा प्रयत्न केला. यामुळे एकच गोंधळ उडाला. मात्र सभेत उपस्थिती कार्यकर्त्यांनी शेतकऱ्याला वेळीस ताब्यात घेतल्याने पुढील अनर्थ टळला आहे.
