पुणे : सोशल मीडियावर कधी काय व्हायरल होईल, याचा नेम नाही. अशातच विद्यार्थ्यांना सहलीसाठी घेऊन जात असताना बसचे अचानक ब्रेक फेल झाले. मात्र चालकाच्या प्रसंगावधानामुळे मोठा अपघात टळला असून, सर्व विद्यार्थी सुखरूप आहेत. हा सर्व थरार सीसीटीव्हीमध्ये कैद झाला आहे. हा प्रकार पुण्याच्या भोरमधील चौपाटी परिसरात घडलाय.
नेमकी काय आहे घटना?
मोरगावमधील खासगी क्लासच्या 34 विद्यार्थ्यांना घेऊन बस क्रमांक MH12HC9119 ही भोर वरंधघाट मार्गे रायगडला निघाली होती. मांढरदेवीचं दर्शन घेतल्यानंतर भोरच्या चौपाटी जवळ बसचा ब्रेक एअर पाईप फुटल्यान बसचे ब्रेक निकामी झाले. बसचं ब्रेक फेल झाल्याचं लक्षात येताच चालकाने धावत्या बसमधून उडी मारून बसच्या चाकाखाली दगड टाकल्यानं बसवर नियंत्रण मिळवण शक्य झालं.
बारामतीच्या मोरगावमधील खासगी क्लासच्या विद्यार्थ्यांना, सहलीसाठी घेऊन निघालेल्या बसचं ब्रेक अचानक फेल झालं. या बसमध्ये 34 विद्यार्थी होते. pic.twitter.com/LAzrCSK0uF
— News18Lokmat (@News18lokmat) February 5, 2023
चालकाच्या प्रसंगावधानामुळे 34 विद्यार्थांचा जीव वाचला आहे. ही सर्व घटना सीसीटीव्हीमध्ये कैद झाली आहे. घटनेची माहिती मिळताच पोलीसही घटनास्थळी दाखल झाले होते.
