भडगाव । भडगाव तालुक्यातील एका गावात राहणाऱ्या अल्पवयीन मुलीचा खून करून तिचा मृतदेह गोठ्यात गुरांच्या चाऱ्यामधून लपवून दिल्याची धक्कादायक घटना समोर आली आहे. या घटनेतील संशयित स्वप्नील उर्फ सोन्या विनोद पाटील (वय-१९) याला अटक केली आहे. दरम्यान संशयिताला गुन्ह्याच्या घटनास्थळाची पडताळणी करण्यासाठी गावात घेवून जात असताना संशयिताला घेवून जाणाऱ्या पोलिसांच्या वाहनावर संतप्त ग्रामस्थांनी दगडफेक केल्याची घटना घडली आहे. या घटनेत तीन पोलीस जखमी असल्याची माहिती मिळाली आहे.
काय आहे घटना?
भडगाव तालुक्यातील एका गावात सात वर्षीय अल्पवयीन मुलगी आपल्या परिवारासह वास्तव्याला होती. ३० जुलै रोजी पिडीत मुलगी दुपारी घरी एकटी असताना गावात राहणारा स्वप्नील उर्फ सोन्या विनोद पाटील याने पिडीत मुलीला गुरांच्या गोठ्यात बोलावून घेतले. त्यानंतर तिच्यावर अत्याचार करण्याचा प्रयत्न केला. त्यानंतर तिने घराच्या हा प्रकार सांगेल असे सांगितले. संशयित स्वप्निल पाटील याने मुलीसोबत जबरदस्ती केली, यात मुलीसोबत त्याची झटापट झाली.
यादरम्यान स्वप्निलने दोनवेळा मुलीच्या डोक्यात गोठ्यात पडलेला दगड मारला. याबद्दल कुणालाही संशय अथवा घटनेची माहिती मिळू नये म्हणून स्वप्निलने मुलीचा मृतदेह गोठ्यात असलेल्या गुरांच्या चाऱ्यामध्ये लपवून दिला. दरम्यान मुलीचा शोध घेऊन देखील ती सापडत नसल्याने ती बेपत्ता झाल्यासह अपहरणाची तक्रार पालकांनी पोलीस स्टेशनला केली होती. त्यानुसार भडगाव पोलीस ठाण्यात अपहरणाचा गुन्हा दाखल करण्यात आला होता.
दोन दिवसांपासून मृतदेह कडब्याच्या कुट्टीत असल्याने त्यातून दुर्गंधी येवू लागल्याने हा प्रकार १ ऑगस्ट रोजी उघडकीला आला. गुरांच्या चाऱ्यामध्ये अल्पवयीन मुलीचा मृतदेह संशयास्पद आढळून आल्याने खळबळ उडाली होती. गावातील महिला व नातेवाईकांनी भडगाव पोलीस स्टेशन गाठून या ठिकाणी आरोपीला कठोरात कठोर शिक्षा झाल्याशिवाय आम्ही अंत्यविधी करणार नसल्याचा पवित्रा घेतला होता. तसेच पोलीस ठाण्यात ठिय्या आंदोलन केले होते. ज्या कडब्याच्या कुट्टीत मृतदेह मिळाला तो गोठा स्वप्नील विनोद पाटील (वय १९, रा. गोंडगाव ता. भडगाव) याचा असल्याने पोलिसांचा त्याच्यावर संशय बळावला होता.
