जळगाव प्रतिनिधी | महापालिका क्षेत्रात क्षेत्रसभांच्या नियमांचे उल्लंघन होत असून याचे पालन करण्यात यावे या मागणीसाठी माहिती अधिकार कार्यकर्ते दीपक कुमार गुप्ता यांनी आज भगतसिंह कोश्यारी यांची भेट घेऊन चर्चा केली.
महापालिकेच्या हद्दीत प्रत्येक प्रभागात संबंधीत नगरसेवकाच्या अध्यक्षतेखाली नियमितपणे क्षेत्रसभा घेण्यात यावी असे महापालिका अधिनियम यात स्पष्टपणे नमूद करण्यात आलेले आहे. मात्र याचे पालन होतांना दिसत नाही. यामुळे जळगाव महापालिकेतील प्रत्येक प्रभागात क्षेत्रसभा घेण्यात यावी या मागणीसाठी माहिती अधिकार कार्यकर्ते दीपक कुमार गुप्ता हे सातत्याने पाठपुरावा करत आहेत.
या पार्श्वभूमिवर, गुप्ता यांनी याबाबतची तक्रार करण्यासाठी थेट राज्यपाल भगतसिंह कोश्यारी यांना भेटीसाठी वेळ मागितली होती. राज्यपाल भवनाने त्यांना यासाठी आज सकाळची वेळ दिली होती. या वेळेत गुप्ता यांनी राज्यपाल महोदयांची भेट घेऊन त्यांना क्षेत्रसभा नियमांचे पालन करण्याची सक्ती करण्यात यावी अशी मागणी केली.
दरम्यान, यावर राज्यपाल भगतसिंह कोश्यारी यांनी हे काम राज्य शासनाने असले तरी आपण याबाबत माहिती घेऊ, तोवर आपण उपमुख्यमंत्री अजितदादा पवार यांची भेट घेऊन त्यांना माझा संदर्भ देत याबाबत चर्चा करावी असे भगतसिंह कोश्यारी यांनी दीपककुमार गुप्ता यांना सुचविले. यानुसार ते पुढील आठवड्यात उपमुख्यमंत्र्यांची भेट घेणार आहेत.
