मोबाईल दुकाने फोडणाऱ्यांच्या रावेर पोलिसांनी 48 तासात मुसक्या आवळल्या

रावेर, (प्रतिनिधी)- शहरातील एम.जे. मार्केटमधील मोबाईल विक्री व दुरुस्ती करणाऱ्या तीन दुकानांचे शटर तोडून मोबाईल चोरीची घटना शनिवारी सकाळी घडली होती यातील आरोपीस पोलीसांनी केवळ ४८ तासांत अटक केली आहे.
बस स्थानक परिसराजवळील एम. जे. मार्केट सध्या लॉक डाऊनमुळे बंद असल्याने या संधीचा फायदा घेत शनिवारी सकाळी अडीच वाजेच्या सुमारास अज्ञात चोरट्यांनी लोखंडी रॉडने शटर वाकवून ५४ हजार रुपये किमतीचे जुने व नवीन मोबाईल चोरून नेल्याची घटना घडली. यात सुनील मोबाईल शॉपी मधून सहा हजार ३०० रुपये किमतीचे जुने मोबाईल, खुशी मोबाईल मधून १९ हजार ७०० रुपयांचे तर बाबा मोबाईल मधून २८ हजार रुपयांचे असे एकूण ५४ हजार रूपये किमतीचे मोबाईल अज्ञात चोरट्यांनी चोरून नेले. याबाबत अंकित चंदनानी यांनी दिलेल्या फिर्यादीवरून रावेर पोलिसांत गुन्हा दाखल करण्यात आला होता.
दरम्यान पोलीसांनी मोठ्या शिताफीने तपास चक्र फिरवून आरोपी मोबाईल चोरटा गोंड्या उर्फ महेंद्र ज्ञानेश्वर कोळी रा. निंबोल तालुका रावेर यास मुद्देमालासह अटक केली आहे. केवळ ४८ तासांत आरोपीस गजाआड केल्याने पोलीसांचे कौतुक होत आहे.
या गुन्ह्याच्या तपास कामी फैजपूर उपविभागीय पोलीस अधीक्षक नरेंद्र पिंगळे, पोलीस निरीक्षक रामदास वाकोडे यांच्या मार्गदर्शनाखाली महेंद्र सुरवाडे, तुषार मोरे, भरत सोपे, मनोज म्हस्के, सुरेश मेढे, विकास पहुरकर यांनी हि कामगिरी केली.