जळगाव : पहाटे मॉर्निंग वॉक करण्यासाठी घराबाहेर पडलेल्या दाम्पत्यास एका स्कूल बसने धडक दिल्याने पती जागीच ठार झाले तर पत्नी गंभीर जखमी झाल्याची घटना सोमवारी घडलीय. ही घटना जळगाव शहरातील अजिंठा रस्त्यावरील नेक्सा शोरूमच्या बाहेर घडलीय. गफ्फार सुलेमान पिंजारी (वय ५४, रा. सुप्रीम कॉलनी) असे मृत प्रौढाचे नाव आहे.
याबाबत असे की, पिंजारी दाम्पत्य नियमितपणे मॉर्निंग वॉकला जात असे. सोमवारी नेहमीप्रमाणे ते घरातून बाहेर पडले. पायी चालत असताना मागून येणाऱ्या स्कूल बसने (क्रमांक एमएच-२०, बीवाय-९०३४) त्यांना धडक दिली.
या अपघातात पिंजारी हे जागीच ठार झाले. तर रईसाबी यांच्या डोक्याला गंभीर दुखापत झाल्यामुळे त्या बेशुद्ध झाल्या. घटनेची माहिती मिळताच एमआयडीसी पोलिसांनी दोघांना शासकीय वैद्यकीय महाविद्यालय व रुग्णालयात दाखल केले. त्यानंतर रईसाबी यांना खासगी रुग्णालयात हलवण्यात आले. त्यांच्यावर उपचार सुरू आहेत. या प्रकरणी स्कूल बस चालकावर गुन्हा दाखल करण्यात आला आहे.
