भडगाव – येथून जवळच असलेल्या क.ता.ह.रा.पा.कि.शि.सं.भडगाव संचलीत गो.पु.पाटील माध्य.तथा उच्च माध्यमिक महाविद्यालयात आज शांततेच्या मार्गाने आझाद मैदान,मुंबई येथे आंदोलन करणाऱ्या विनाअनुदानित बिनपगारी शिक्षकांवर झालेल्या अमानुष हल्ल्याच्या निषेधार्थ शासनाचा निषेध व्यक्त करीत काळ्या फिती लावून कामकाज करण्यात आले.
विनाअनुदानित कनिष्ठ महाविद्यालयांना १००% अनुदानित करुन १७-१८ वर्षांपासून विनावेतन सेवा बजावणाऱ्या शिक्षक-शिक्षकेतर कर्मचाऱ्यांना तात्काळ सरकार आदेश काढून पगार सुरु करावा यासाठी महाराष्ट्र राज्य उच्च माध्यमिक विनाअनुदानित कृती समितीसह महाराष्ट्रातील तमाम विनाअनुदानित शिक्षक संघटनांनी पुकारलेल्या बेमुदत धरणे तसेच आमरण उपोषण आंदोलनास काल पोलिसांच्या माध्यमातून मुस्कटदाबीने चिरडण्याचा प्रयत्न करण्यात आल्याच्या निषेधार्थ आज गो.पु.पाटील माध्यमिक व उच्च माध्यमिक विद्यालय कोळगाव (भडगाव) येथे प्राचार्य आर.एस.पाटील यांच्या नेतृत्वाखाली काळ्या फिती लावून शालेय कामकाज करण्यात आले.यावेळी पर्यवेक्षक टी.एस.पाटील,वरिष्ठ शिक्षक अनिल पवार,आर.ए.पाटील,किशोर चौधरी,मनोज पवार आदि शिक्षक-शिक्षकेतर कर्मचाऱ्यांनी झालेल्या घटनेचा तसेच शासनाचा धिक्कार केला असून तात्काळ विनाअनुदानित शिक्षकांचा प्रश्न निकाली काढावा अशी मागणीसुध्दा करण्यात आली आहे.
