बहादूरगड,: हरियाणाच्या बहादूरगडमध्ये पहाटे एक मोठी दुर्घटना घडली. केंद्रानं लागू केलेल्या तीन कृषी कायद्यांविरोधात सुरू असलेल्या आंदोलना दरम्यान आज पहाटे एका भरधाव वेगानं येणाऱ्या ट्रकनं तीन आंदोलनकर्त्या महिलांना चिरडल्यानंतर आक्रोश व्यक्त होतोय. ट्रकनं चिरडल्यानंतर या तिन्ही महिलांना आपले प्राण गमवावे लागलेत तर इतर तीन महिला गंभीर जखमी आहेत. पोलिसांनी घटनास्थळ गाठून तपास सुरू केला.
मिळालेल्या माहितीनुसार, सकाळी 6.30 च्या सुमारास झज्जर रोडवर हा अपघात झाला. या वृद्ध महिला दुभाजकावर बसल्या होत्या, तेव्हा एका भरधाव ट्रकने त्यांच्यावर धडक दिली. यामुळे दोन महिलांचा जागीच मृत्यू झाला, तर एकाचा रुग्णालयात मृत्यू झाला. तीन महिलांची प्रकृती अद्याप चिंताजनक असल्याचे सांगण्यात येत आहे.
शेतकरी चळवळीत या महिलांचा सहभाग होता. या अपघातात मृत्युमुखी पडलेल्या तीन महिला पंजाबमधील मानसा जिल्ह्यातील रहिवासी आहेत. पहाटेच्या सुमारास महिला घरी जाण्यासाठी ऑटोची वाट पाहत दुभाजकावर बसल्या होत्या. तेव्हा झज्जर रोडवरील उड्डाणपुलाखाली भरधाव वेगाने येणाऱ्या ट्रकने त्यांना चिरडले. या अपघातानंतर परिसरात एकच खळबळ उडाली आहे. पोलिसांनी घटनास्थळ गाठून तपास सुरू केला.
केंद्र सरकारच्या तीन कृषी कायद्यांविरोधात नोव्हेंबर 2020 पासून दिल्ली सीमेवर शेतकऱ्यांचे आंदोलन सुरू आहे. या तिन्ही महिलाही या चळवळीशी जोडल्या गेल्या होत्या. आवर्तनाखाली या महिला आपल्या घरी जाणार होत्या, मात्र त्यापूर्वीच तिघांचा मृत्यू झाला.
