मुंबई,(वृत्तसंस्था)- राष्ट्रीय चित्रपट पुरस्कार विजेती बालिका वधू फेम अभिनेत्री ‘दादीसा’ सुरेखा सिक्री यांचे आज दिनांक 16 रोजी सकाळी मुंबईत निधन झाले.
मिळालेल्या माहितीनुसार अभिनेत्री सुरेखा सिक्री या गेल्या काही दिवसांपासून आजारी होत्या. दरम्यान वयाच्या 75 व्या वर्षी हृदयविकाराच्या कारणामुळे मृत्यू झाल्याची पुष्टी केली आहे.
सुरेखा सिक्री यांच्या निधनाचे वृत्त मॅनेजरने दिले.
दुसऱ्या ब्रेन स्ट्रोक नंतर अभिनेत्री सुरेखा यांच्यावर उपचाराचा वेगवान परिणाम झाला नाही. त्या बराच काळ रुग्णालयात होत्या.त्यांच्या निधनाने शोककळा पसरली आहे.
अभिनयसंपन्न अभिनेत्री काळाच्या पडद्याआड – सांस्कृतिक कार्यमंत्री अमित देशमुख
राष्ट्रीय पुरस्कार विजेत्या ज्येष्ठ अभिनेत्री सुरेखा सिक्री यांच्या निधनाबद्दल सांस्कृतिक कार्यमंत्री अमित देशमुख यांनी शोक व्यक्त केला आहे. सिक्री यांच्या निधनाने एक अभिनयसंपन्न ज्येष्ठ अभिनेत्री आपण गमावली आहे, या शब्दांत त्यांनी श्रद्धांजली वाहिली आहे.
दिल्लीच्या नॅशनल स्कूल ऑफ ड्रामामधून अभिनयाचे धडे घेतलेल्या सुरेखा सिक्री यांनी नाटकं, मालिका, चित्रपट अशा सर्वच क्षेत्रात काम केले असून अनेक चित्रपटांमधील त्यांच्या सहायक भूमिका लोकप्रिय ठरल्या आहेत. तमस, मम्मो आणि बधाई हो या चित्रपटांमधील भूमिकांसाठी त्यांना सर्वोत्कृष्ट सहायक अभिनेत्रीचे राष्ट्रीय पुरस्कार मिळाले आहेत, बालिका वधू या मालिकेतील भूमिका विशेष लोकप्रिय ठरली असून त्यांच्या कसदार अभिनयाने त्या प्रेक्षकांच्या पसंतीस उतरल्या होत्या. आपल्या दर्जेदार अभिनयातून चित्रपट आणि मालिकांद्वारे घरा-घरांत पोहोचलेल्या सुरेखा सिक्री यांच्या निधनाने चित्रपटसृष्टीची मोठी हानी झाली आहे, असे सांस्कृतिक कार्यमंत्री अमित देशमुख यांनी शोकसंदेशात म्हटले आहे.
