भोपाळः – राहुल गांधी यांच्याकडे पुन्हा एकदा काँग्रेस पार्टीच्या अध्यक्षपदाची जबाबदारी देण्यासंबंधी विचार सुरू असताना पक्षाच्या सरचिटणीस प्रियांका गांधी यांच्या जन्मदिनाचे औचित्य साधून इंदिरा इज बॅक ‘ची घोषणा काँग्रेस कार्यकर्त्यांकडून करण्यात आली आहे. आज १२ जानेवारी रोजी प्रियांका गांधी यांचा वाढदिवस आहे. वाढदिवसानिमित्त काँग्रेस कार्यकर्त्यांनी जाहिरातबाजी केली असून प्रियांका गांधी यांना मां दुर्गाचा अवतार म्हटलं आहे.
लोकसभेत काँग्रेस पक्षाचा झालेल्या दारूण पराभवानंतर राहुल गांधी यांनी काँग्रेसच्या राष्ट्रीय अध्यक्षपदाचा राजीनामा दिला होता. त्यानंतर सोनिया गांधी यांच्याकडे पक्षाची सूत्रे सोपवण्यात आली आहे. तर दुसरीकडे प्रियांका गांधी यांना सरचिटणीस सह संपूर्ण उत्तर प्रदेश राज्याचे प्रभारी बनवण्यात आले आहे. त्यानंतर प्रियांका गांधी राजकारणात सक्रीय झाल्या आहेत. प्रियांका गांधी यांचा १२ जानेवारी रोजी वाढदिवस साजरा करण्यात आला. या निमित्त मध्य प्रदेशसह अन्य राज्यात मोठ- मोठ्या जाहिराती देऊन त्यांचा वाढदिवस साजरा करण्यात आला आहे. काही जाहिरातीतून ‘इंदिरा इज बॅक’ अशा घोषणा देण्यात आल्या आहेत. या जाहिरातीवर भाजपने टीका केली आहे.
वृत्तमानपत्रात छापण्यात आलेल्या जाहिरातीत इंदिरा गांधी यांच्या फोटोसह प्रियांका गांधी यांचा फोटो आहे. या फोटोतून प्रियांका गांधी यांना इंदिरा गांधी दाखवण्याचा प्रयत्न करण्यात आला आहे. इंदिरा गांधी यांचा ब्लॅक अँड व्हाईट तर प्रियांका गांधी यांचा कलरमध्ये फोटो दिसत आहे. तसेच ‘इंदिरा इज बॅक’ असं लिहिण्यात आले आहे. प्रियांका गांधी यांच्या वाढदिवसानिमित्त प्रसिद्ध करण्यात आलेल्या जाहिरातीत राजकारण शोधण्याचा कुणी प्रयत्न करू नये, प्रियांका यांच्या कार्यशैलीत तसेच त्यांच्या वागण्या बोलण्यातून इंदिरा गांधी यांची झलक स्पष्टपणे दिसतेय, प्रियांका गांधी या इंदिरा गांधी यांच्यासारख्या दिसतात, त्यामुळे काँग्रेस कार्यकर्त्यांनी आपल्या भावना व्यक्त करण्याचा प्रयत्न केला आहे, असे काँग्रेस मीडिया विभागच्या अध्यक्षा शोभा ओझा यांनी म्हटले आहे. काँग्रेस पक्षात घराणेशाही आहे. काँग्रेसमध्ये कोणालाही राजकारण करायचे असेल तर त्या सर्वांना आधी सोनिया, राहुल, प्रियांका गांधी यांची मर्जी सांभाळणे गरजेचे आहे, असे भाजपने म्हटले आहे.
